Пӧръеҥ онаеҥ деке мия, ушмен гыч ыштыме пуран коркам налеш, пелыжым йӱэш да шкенжын ойырымо ӱдырамашыж деке куштен мия. Ӱдырамаш коркам налеш, кодшо пурам йӱэш да пӧръеҥлан пӧртылта. Тидын дене тудо пырля кушташ кумылан улмыжым ончыкта. Пӧръеҥ онаеҥ деке куштен мия, вуйым савен, коркам пӧртылта. Вара ойырымо ӱдырамаш деке куштенак мия. Ӱдырамаш пӧръеҥ вачыш кидым пышта, а пӧръеҥ — ӱдырамаш вачыш. Нуно коктын мужыр дене кушташ тӱҥалыт. Тиде — «ташлама куштымаш».

Куштымаш мучаште мужыр онаеҥ деке куштенак лишемеш, пура дене темыме кок коркам налеш. Ӱдырамаш шӱвырзым сийла, нуно коктын пеле гыч йӱыт — «пеле-пеле йӱмаш» маныт. Пӧръеҥ шинчыше моло еҥлан коркам пуа, тыгак «пеле-пеле» йӱыт. Пуста коркам угыч онаеҥлан пӧртылтат.

Вара вес мужыр-влак кушташ лектыт. Ик ойӧрӧ уло: тиде кечын вате-марий-влак пырля куштен огыт керт. Тыгак самырык-влакат — марлан кайыдыме да ӱдырым налдыме-шамыч — «ташлама корка» йӱлам шуктен огыт керт. 

«Кугече — ош кече» пайрем годым муно денат модын ончышт. Касым ныл гармонист — Юрий Кудрявцев, Вениамин Кугергин, Юрий Иванов, Леонид Ермаков, тыгак шӱвырзӧ Сергей Пчёлкин сӧрастарышт.

Мероприятийым Марий Эл Республикысе тӱвыра, печать да калык-влакын пашашт шотышто министерствын полшыж дене эртарыме.