Курыкмарий районышто эртыше Мер каҥаш президиумын заседанийыштыже кугурак-влакын ушемыштым (совет старейшин) ыштыме нерген пунчалым икой дене приниматлыме. Тудым вуйлаташ 2012-2016 ийласе Оньыжа, Марий Эл Кугыжаныш Погын вуйлатышын алмаштышыже А.Н.Ивановлан ӱшаныме. Мер каҥашын заседанийыште Марий Эл Республик вуйлатышын икымше алмаштышыже, тӱвыра, печать да калык-влакын пашашт шотышто министр М.З.Васютин, Курыкмарий район администраций вуйлатыше В.С.Сеюшев лийыныт. Оньыжа Э.В.Александров тудым вӱден. Курыкмарий районысо Мер каҥашын актившын пашажым сайлан шотлымо, марий тӱняште паша опытым шараш кӱлмым палемдыме. Заседанийын участникше-влак Эмансола кыдалаш школышто марий йылме ден сылнымутым туныктымо кӱкшытым акленыт, тыгак кава йымалнысе да Н.Игнатьев лӱмеш почмо этнографий тоштерлаште лийыныт, ялысе сӱретче С.Алдушкинын илемжым ончен савырненыт. Тений 9, 10 декабрьыште Йошкар-Олаште марий форумым: шыже сессий ден Мер каҥашын III пленумым – эртараш палемдыме. Форум эртыме кечылаште «Марий калыкын ончыкылыкшо: марий самырык тукымын ончалтышыж гоч» конференций лийшаш. Заседанийыште тыгак моло йодышымат ончен лекме.