Икымше кечын рӱдоласе у Курчак театрыш районласе школлаште тунемше-влак погыненыт. Чылаже лу район гыч 90 икшыве толын. Тушко нуным марий йылмым да сылнымутым тунеммаште, тӱрлӧ конкурс ден олимпиадыште кӱкшӧ сеҥымашке шумыштым аклен ӱжмӧ. Тунемше-влак шкештат идалыкаш пашаштым ончыкташ вашкеныт. Рӱдер ончылгоч кум конкурсым увертарен ыле, кажныже уш-акылым, кид мастарлыкым аклыше лийыныт.
«Эн сай У ий чием» конкурс пайремлык костюмышто марий кумылым йодын. Тидлан Эвелина Егошина (Шернур район) марий сонарзе ӱдырын тошто вургемже эн келшыше лийын. Тудлан жюрин еҥже-влак ик йӱк дене икымше верым пуаш ыштеныт. Аня Никитина (Медведево поселко) Рывыж маскарад вургемжылан марий тӱсым пуртен, кокымшо вер дене палемдалтын. Куженер вел гыч Сергей Иванов Агытан маскарад костюмжылан кумшо верым налын.
«У ий открытке» конкурсышто сеҥышыш лектыныт: Полина Овечкина (Шернур район) – икымше, Дарья Пуртова (Килемар район) – кокымшо, Эльмира Усова (Советский район) – кумшо вер.
«У ий марий модыш» конкурсышто чолгалыкым да усталыкым кумло утла йоча ончыктен. Эн мотор модышлан Сергей Крыловын (Медведево поселко) пашажым шотлымо да икымше верым пуымо. Софья Козлова (Оршанке район) кокымшо, Валерий Куклин (Советский район) кумшо верлам налыныт.
Пайрем юзо виян лийын, йоча-влакым йомак кугыжанышын геройжо-влак: Агытан, Рывыж, Коявоҥго – порылык дене чояланымашым да ондалымашым сеҥаш туныктеныт. У ий пайрем Йӱштӧ кугыза ден Лумӱдыр деч посна огеш эрте. А нуныжо ынде ятыр ий йоча-влакым марла саламлат. Эше вургемыштат марий тӱр дене сӧрастарыме лийын. Нуно йомак кугыжанышыш погынышо марий костюман ӱдыр-рвезе-влаклан туштым туштеныт, мурым муреныт. Нуныжат парымеш кодын огытыл, шкетын веле огыл, эсогыл классге лектын (У Торъял Токтарсола школын кумшо классыште тунемше-влак семын) куштымаште, мурымаште да почеламутым лудмаште шке мастарлыкыштым ончыктеныт.
Эрлашынже Йошкар-Оласе йочасадыш коштшо икшыве-влак тыгаяк лӱман мероприятийыште марий йылме ден тӱвыралан шӱмаҥме кумылыштым почыныт. Йӱштӧ кугыза ден Лумӱдыр дене пырля пайремыш вич йочасад гыч толшо 50 наре йоча мотор кож йыр пӧрдын, модын, куштен, почеламутым лудын.
Тиде пайремыштат ончылгоч увертарыме кок конкурсым иктешлыме. «Эн сай У ий модыш» таҥасымашыште 50-ше номеран йочасадын воспитанникше Дима Ефимов «Лум йолташ» модышыжлан икымше верыш лектын. 29-ше номеран йочасадыште шуаралтше Яков Шабалин «Оҥгыр» модышыжо дене кокымшо верым налын. 61-ше «Теремок» йочасад кумшо вер дене палемдалте.
«Эн сай чием» конкурсышто 29-ше номеран йочасадын воспитанницыже Лиза Белогусева икымше, 32-шо номеран садик гыч Дима Тарасов кокымшо, 61-ше номеран гыч Олег Королев кумшо верлаш лектыныт.
Марий пайремыш толшо кажне икшывылан Йӱштӧ кугыза ден Лумӱдыр шере пӧлекым кучыктеныт, а конкурслаште сеҥышыш да призовой верлаш лекше-влаклан Чап танык да пӧлекым пуымо. Республикысе курчак театр школышто тунемше да сеҥыше радамыш логалше йоча-влаклан спектакльыш билетым да курчак театрын пӧртшым войзыман «магниткым» кучыктеныт.
РФ-н Кугыжаныш Думын депутатше С.Ю.Солнцева, Марий Мер Каҥаш, «Саскавий» марий ӱдырамаш ушем марий елкым эртарен колтымаште надырым пыштеныт. Республикысе марий тӱвыра рӱдер Светлана Юрьевналан да мер организаций-влакын вуйлатышышт Э.В.Александров ден Л.И.Кошкиналан да мер пашаеҥ-влаклан таушта да шушаш У ий да Рошто пайрем-влак дене саламла, пашаштышт сеҥымашым, пеҥгыде тазалыкым, кече гае волгыдылыкым тылана.
