Эрик Сапаев 1932 ий 4 мартыште Йошкар-Олаште служащий-влакын ешеш шочын. Ачаже, Никита Никифорович, партий пашаеҥ, 1937 ийыште репрессийыш логалын. Аваже, Вера Евдокимовна, йочаже-влак дене шочмо вер-шӧрыш, У Торъял район Човыксолаш пӧртылын. Эрик изиж годымак гармоньым, скрипкам, балалайкым шокташ тунемын, марий калык семым йымыжан шоктен.
Тудо 1952 ийыште И.С.Палантай лӱмеш Йошкар-Оласе музыкальный училищым, 1958 ийыште Озаҥ оласе консерваторийым тунем лектын. Ӱмыргорныжо пеш кӱчык лийын, 31 ияш ош тӱня дене чеверласен, но ыштен кодымо пашаже марий сымыктышым вияҥдымаште да тӱзландарымаште моткоч кугу. Училищыште тунеммыж годымак самырык музыканче марий поэт-влакын почеламутыштлан семым келыштарен, фортепианолан оргинальный манме Маршым возен. Консерваторийыште тунеммыж годым Э.Сапаев «Акпатыр» оперым возаш кумылаҥын. Сюжетлан С. Чавайнын «Акпатыр» драмыжым налын. Либреттым марий поэт-влак Г.Матюковский, И.Осмин да М.Якимов возеныт. 1963 ий 5 апрельыште тудым сценыш лукмо. Тиде кечым марий оперын шочмо кечыж семын палемдена. 1970 ийыште «Акпатыр» оперым возышо автор Э.Сапаевлан (колымыж деч вара) Марий АССР-ын Кугыжаныш премийын лауреатше лӱмым пуымо.
Опер деч посна марий композитор «Торъял сюите», «Струнный квартет», «Оркестр дене скрипке концерт» произведений-влакым, тыгак спектакль-влаклан муро-влакым возен.
Э.Н.Сапаевын лӱмжым Йошкар-Оласе опер да балет театр, У-Торъял районысо сымыктыш школ нумалыт. Торъял кундем землякше да марий профессионал музыкын классикше Э.Сапаев лӱмеш шарнымаш касым эртара. «Акпатыр» марий опер тачат сценыште шындалтеш.
