Тушко чыла еҥ ушнен кертеш, кӧн ача-аваже, коча-коваже, родо-тукымжо але лишыл пошкудыжо Кугу Ачамланде сарыште кредалын, нунын нерген шарнымашым тиде солык гоч у тукымлан кодаш шона.

Тиде акцийышке ушнаш гын, тудлан 50 х 50 кугытан куэмышке салтакын лӱмжым, фамилийжым, ачалӱмжым, сарышке кайыме але толмо, йоммо, колымо жапшым, званийжым да боевой наградыжым тӱрлышаш. Куэмым посна сынаным ойыраш кӱлеш: сареш вуйым пыштышылан — йошкаргым, сареш йомшылан — ошым, сар деч вара колышылан — ошалге-кандым. Тканьжым (куэмже) габардиным ойыраш келшен толеш.

Ямде паша-влакым 3 май марте марий тӱвыра рӱдерыш кондыман. Варажым нуным иктеш ургат. «Салтак солыкым» 9 майыште, Сеҥымаш Парадыште «Мондалтдыме полк» дене пырля наҥгаят. 22 июньышто, Кугу Ачамланде сар тӱҥалме кечын, Т.Евсеев лӱмеш калыкле тоштерышке вераҥдат, «Нуно Шочмэл верч кредалыныт» ончерыште ончыкталтыт.

«Салтак солык» акций тений кокымшо гана эртаралтеш. Икымше гана тудо Кугу Сеҥымашын 70 ий темме лӱмеш эртаралтын. Тунам Сеҥымаш Парадыште 23 метр кужытан солыкым самырык ӱдыр-рвезе-влак наҥгаеныт. Кызыт тиде солык Т.Евсеев лӱмеш калыкле тоштерыште аралалтеш.