Республикысе курчак театр тиде кечын пуйто чевер олыкыш савырныш. Йочасадыш коштшо да конкурсыш ушнышо кажне икшыве марий вургеман лийын. Южо рвезыжын кидыште тӱмыр, шӱвыр, гармонь лийыныт.
Конкурсыш 12 район, Йошкар-ола гыч 110 утла йоча мурен але куштен моштымо усталыкшым почын. 13 изи солист сценыш лектын, 6 мурышо йоча ансамбль шке мастарлыкшым ончыктен, 9 куштышо коллектив марий койышыжым почын. Тиде чот ешаралт кертеш ыле, но Оршанке да Морко районла гыч тӱрлӧ амаллан кӧра конкурсыш толын огытыл.
Республикысе марий тӱвыра рӱдер вуйлатыше, О.Ипай лӱмеш премийын лауреатше Наталья Пушкина (жюри председатель), Марий Эл Республикын туныктыш да шанче министерствын специалистше Наталья Софронова, Республикысе курчак театрын тӱҥ режиссерын алмаштышыже, Марий Эл республикын калык артистше Эльвира Лисицина, эстраде мурызо, Республикысе марий тӱвыра рӱдер пеленсе «Юкече» вокал йоча коллективым вуйлатыше, О. Ипай лӱмеш премийын лауреатше Светлана Яндукова, педагог-хореограф, «Шокто, гармонь» йоча образцовый фольклор ансамбльым вуйлатыше Раисия Иванова конкурсыш ушнышо икшыве-влакын усталыкыштым акленыт.
Мутат уке, кажне йоча сеҥыше лийын. Сеҥен шкенжын лӱдмыжым, сцене деч ӧрмалгымыжым. Чыла выступлений кӱшытыштӧ лийын. Но конкурс эре эн сайжым кычалеш.
Соло номинацийыште Йошкар-Оласе «Изюминка» йочасад гыч Валерия Козлова 1-ше верыш лектын. Вика «Чоя шошо» мурым йоҥгалтарен.
2-шо вер дене Курымарий район Микряк селасе школ пеленсе дошкольный группын воспитанницыже Виктория Романова палемдалтын. Тудо «Пуры ирок, атиэм» мурым мурен.
Волжский район Шарача йочасад гыч Мария Шураева «Авай, молан кенеж шортеш?» муро дене 3-шо верыш лектын.
Мурышо ансамбль-влак коклаште 1 верыш Шернур поселко гыч «Ший оҥгыр» йочасад лектын. «Эх, ну, Калтаса» мурым рвезе-влак йоҥгалтареныт.
2 верыште – Медведево гыч «Золотая рыбка» йочасад. Изи ӱдыр-влак «Марий лӱм» мурым сылнын муралтеныт.
3 верыш Советский район Шуарсола школ пеленсе дошкольный группыш коштшо икшыве-влак лектыныт. Рвезе-влак сылнын марий такмак-влакым муралтеныт.
Эн виян куштышо йоча коллектив Волжский кундемыште уло. Шарача йочасадын изи рвезыже «Шӱвыр дене куштымашым» ончыктеныт, тошто марий куштымашын чыла йыжыҥжым манмыла почын пуэныт. Икымше верым налыныт. Молодец улыт!
2 верыш Медведево вел «Ший оҥгыр» йочасадын изи куштызыжо-влак «Ме марий улына» номер дене лектыныт.
Йошкар-ола «Ший оҥгыр» йочасадын воспитанникше-влак, «Шовыч дене куштымаш» номерым ончыктеныт, кумшо вер дене палемдалтыныт.
Тыгак эн изи участникым посна палемдыме. Советский район Шуарсола школ гыч Виктория Козыревалан але ныл ий веле темын, «Авамлан» мурым моткоч сылнын йоҥгалтарыш, марий эстрадын ончыкылык шӱдыржӧ лиеш манын ӱшаныме шуэш. Тыгак Звенигово район Шолеҥер поселкысо йочасадын воспитанникше влакым «Кап-кап-мурыштлан» приз дене палемдыме.
Республикысе марий газет-влак марий мероприятийым эртарымаште марий тӱвыра рӱдерлан кажне гана полшен шогат. Информаций велым веле огыл полшат, тыгак приз-влакым ойырат. Тыгак лие кызытат: «Марий Эл», «Кугарня» да «Ямде лий» газет-влак деч пӧлек-влакым ыштеныт. Йоча газетын тӱҥ редакторжо Лидия Семенова Медведево район Арбан селасе йочасадын куштышо ансамбльжым посна пӧлек дене палемден.
«Пеледше тукым» конкурсым эртарен колтымаште кугу надырым йочасадыште тыршыше воспитататель, музык дене вуйлатыше-влак пыштеныт. Нуныланат мероприятияйын организаторжо – Республикысе марий тӱвыра рӱдер – таумутым кучыктен. Конкурсыш толшо кажне икшыве сертификат ден пӧлекым налын, а сеҥышыш лекше солист ден йоча коллектив-влакым чап танык дене палемдыме.
«Пеледше тукым» республик кӱкшытан конкурсышто тыгак «Фотопаша» тапыр лийын. Тушко 40 утла паша пурен. Марий вургемым чийыше йоча-влакым войзыман снимке-влакым чыла гаяк район да ола гыч колтеныт. Республикысе марий тӱвыра рӱдерын пашаеҥышт дене пырля кумдан палыме фотограф Петр Васильев паша-влакым аклен.
Шернур район гыч Лювена Евдокимова ден Ольга Иванова «Марий улына – марий шӱлыш дене илена» пашашт 1-ше вер дене палемдалтын. Курыкмарий район Микряк села гыч Татьяна Элянова «Поханвлӓ» («Курчак-влак») пашажлан 2-шо верыш лектын.
Провой кундем Кожласола села гыч Любовь Пакалина «Ӱдыр марий вургем дене» фотожо 3-шо вер дене па
лемдалтын.
Республикысе марий тӱвыра рӱдер республик кӱкшытан «Пеледше тукым» йоча усталык конкурсым эртарен колтымаште районласе туныктымо пӧлка, йочасад вуйлатыше, воспитатель да музык дене вуйлатыше-влаклан таум каласа, келшымаш кыл ончыкыжымат чоткыдо лиеш манын ӱшана. Поснак кугу таум Марий кугыжаныш университетын да Республикысе тӱвыра колледжын студентше-влак Настя Никифорова ден Анжелика Матвеевалан, Катя Актуганова ден Анита Андреевалан каласыме шуэш. Нуно мероприятийыште волонтер пашам моткоч устан шуктеныт, йоча-влакым тӱрлӧ модыш дене модыктеныт.
