А тӱҥалын рӱдер шке пашажым «Марий кас» дене. Икымше мероприятий 1999 ий 7 ноябрьыште В.И. Ленин лӱмеш тӱвыра полатыште лийын. Эртыше жапыште «Марий касым» эртарыме вер вашталт шоген, но икте вашталтын огыл – ола кӱкшытыштӧ марий тӱвырам шарен шогымаш. Тидыжат Йошкар-Олаште марий ансамбль-влаклан шочаш могай-гынат амал лийын. Тыгак марий рӱдолаште веле огыл «Марий кас» эртаралтеш, а марий-влакын илыме регионлаште тиде тӱҥалтышым авалтеныт да кызыт кумдан кучылтыт.

Пытартыш жапыште шошо-кеҥеж пагытыште марий мероприятий Чарла Кремльыште эрта. Черетан вашлиймаш марте жап шуко кодын огыл – 12 сентябрьыште угыч Чарла Кремльыште вашлийына.

Марий тӱвыра рӱдер пеленысе усталык коллектив-влакын дене пырля марий калыкын илыме вер-шӧрыш сем йогын почеш муралтен-кушталташ йон лиеш. Касыште гармоньым Анатолий Ермаков шокташ тӱҥалеш.