Рӱдолаште эртыше пайремым районла гыч толшо фольклор коллектив-влак сӧрастараш тӱҥалыт. Тыгак Киров кундем «Уржум сем» фольклор да Пошкырт кундем Мишкан велысе «Акарт» ансамбль-влак пайремын шергакан унаже лийыт, шкевелысе муро да куштымашышт дене куандарат. Пайремым шествий тӱҥалеш. В.П.Никонов площадь гыч С.Чавайн лӱмеш бульвар дене рӱдӧ каныме парк марте фольклор коллектив-влак мурен-куштен эртат. Пайремыш толшо калыклан шокшо мелнам темлат, курык гыч ӱярня вара дене мунчалтымаш, калык модыш дене тӱшкан модмаш лиеш. Пайрем 10 шагатлан тӱҥалеш.

26 февральыште, Марий Эл Республикысе тӱвыра, печать да калык-влакын пашашт шотышто министерствын, Туныктыш да шанче министерствын да Морко землячествын полшымыштлан эҥертен, Республикысе марий тӱвыра рӱдер «Йоча Ӱярня» пайремым Морко район Шордӱр тӱҥ школышто эртара. Тушко 9 гыч 16 ияш марте тунемше-влакым пагален ӱжмӧ.

Тудо конкурслан поян лиеш. Тидыже тунемше-влаклан шинчымашым да проворлыкым ончыкташ йӧным пуа.

«Марий йӱла чоныштына ила» квест-модыш марий калыкын йӱлаже да пайремже нерген лиеш. Ребус, тушто, кроссворд да сканворд йӧн-влаклан эҥертен, заданий-влак шукталтыт.

Конкурс-влак тыгай номинаций дене эрташ тӱҥалыт:

1.«Ӱярня мелна-2017». Тушто кочкышын вужгата да тамле улмыжо, эн моторын сӧрастарен моштымо деч посна тудын нерген оҥайын каласкалыме аклалтеш.

2. «Ӱярня кува» . Пайремын символжо тыгайрак лийшаш: ик метр деч кӱкшӱ огыл, «йолжо» пеҥгыдын шогышаш, чийыме вургемже марий пайремын тӱсшылан да йӱлажлан келшыше лийшаш.

3. «Ӱярня такмак-влак». Такмак ӱярня пайремлан мут сылнылык да йӱлам почын пуышо «сынан» лийшаш.

Пайремын организаторжо-влак тунемше-влакым мероприятийыш кондаш районласе школ вуйлатыше-шамычлан темлат, молан манаш гын марий тӱвырам, калык йӱлам да фольклорым икшывын шӱм-чоныш изинек шыҥдарен шогымо шинчымаш кӱкшытым кугемдаш мыняр-гынат полша, кугезе коча-кованан йӱлажым арален шогымаште пеҥгыде тошкалтыш семын кодеш. Мероприятий марий йылме дене эрташ тӱҥалеш. «Йоча Ӱярня» пайрем 10 шагатлан тӱҥалеш.