Шанчыеҥ-влак марий калыкын эше ик эн тошто, акрет годымак шочшо да кызытсе жап марте аралалт кодшо ик сомылым палемдат – тиде кӱртньым таптыме паша. Апшат вашталташ лийдыме мастарлан шотлалтын. Сурт кӧргыштӧ кучылталтше тӱрлӧ арвер, ялозанлык ӱзгар, имньылан таган, сар-курал – чылажымат апшат-влак ямдыленыт. Но 16 курымышто руш кугыжа Иван Грозный марий калыклан, тыгак Юл эҥер кундемыште илыше руш огыл калык-влаклан тиде сомылым ышташ чарен. 18 курым гыч веле марий-влак ты сомыллан угыч кумылаҥыныт. А яллаште колхоз-влакын шочмышт да вияҥме жапыште апшаткудо кажне гаяк лийыныт да ялозанлык техникым олмыктымаште надырым пыштен. Ял калыкланат апшат-влак сурт-печыште кучылтмо ӱзгар-влакым таптеныт.

Апшат паша кызытат ила, ынде тудо сымыктыш, искусство семын утларакше вияҥеш. Марий республикыште лач тиде корным 30 ий утла кӱртньо дене сӱретлыше мастар Н.Тимофеев пеҥгыдын тошка, марий кундемыштына апшат пашалан у шӱлышым пуэн веле огыл, тудым усталык пашашке савырен. Николай Григорьевич апшат сомыллан самырык тукымым туныкташ апшаткудыжо пелен студийым почын.

Производство кӱкшытыштӧ марий калыкын эргыже В.Ф Евдокимов апшат семын Социалистический Пашан Геройжо лӱмым сулен налын.