Нуно – марий йӱланам да йылмынам аклен кушшо алмаштышна улыт манаш лиеш. Школ, район да республик кӱкшытыштӧ эртаралтше мероприятийлаште чолгалыкым ончыктеныт, тӱрлӧ конкурсышто сеҥышыш лектыныт.
Пайремым театрын артистше-влак «Кум ака-шӱжар» йомак-спектакль дене почыныт.
Вара «У ий куан» интермедий лийын. Тудын кышкарыште кышкарыште увертарыме «У ий чием», «У ий дене» видеосаламлымаш, «Йӱштӧ Кугызалан серыш» конкурслаште сеҥышыш лекше-влакым саламлыме.
Ийгот шот дене кум тӱшка коклаште сеҥыше-влакым палемдыме. Пайремыште 26 йоча тиде радамыш логалын, Йӱштӧ кугыза да Лум ӱдыр нунылан дипломым да пӧлекым кучыктеныт.
Тыгак Ава кечылан пӧлеклалтше «Авам дене пырля» республикысе усталык онлайн-конкурсын кум номинацийыште сеҥыше-влакым палемдыме.
«Мунло» уш-акыл онлайн-модмашыш ушнышо команде-влакымат саламлыме. Ушештарен кодыман: тушко Йошкар-Ола, Медведево, Курыкмарий, Шернур, Параньга, Волжский, Советский, У-Торъял, Куженер, Мари-Турек, Звенигово и Килемар районла гыч 19 команде ушнен. Ӱдыр-рвезе-влак «Шочмо кундемын кумдан палыме еҥже-влак», «Марий сылнымут да йылме», «Марий калык йӱла-влак» йыжыҥлаште уш-акылыштым тергеныт.
Ӱдыр-рвезе-влак журналист-влаклан пайрем эртыме нерген шонымашыштым ойленыт, моторын сӧрастарыме кож воктене Йӱштӧ кугыза да Лум ӱдыр, марий йомакысе герой-влак дене пырля войзалтыныт. Кож воктене Йӱштӧ кугызалан почеламутым кумылын каласаленыт. А Марий Турек район Арбор школын 2-шо классыште тунемше Ростислав Васинкинын гармоньым шоктымыж почеш эрвелмарий калык муро почеш муралтен-чӱӵкалтеныт. Йошкар-Олан рӱдӧ площадьыштыже Марий Элын тӱҥ У ий кожым кугешнен онченыт.
Пайремыш толшо кажне йоча шере пӧлекым налын каен. Мероприятий тӱрыснек марий йылме дене эртен.
«Тыгай мероприятий йоча-влакым марий йылмым тунемаш кумылаҥда, марий улмына дене кугешнаш тарата,» – палемдыш Марий тӱвыра рӱдерын директоржо Наталья Пушкина.
