Сценыште 5 команде тыршыш – тиде Оршанкысе шуко профилян колледжын, Советский посёлкысо 3-шо №-ан школын, Моркысо “газовик”-влакын, Республикысе марий тӱвыра рӱдерын “Кумыл” да ММЗ-ын командышт.

Ончышо-влак ужыч: чыла командыжат шке моштымашыжым кертмыж семын тӱрыс почын пуаш тыршыш, но таҥасымаште, кузе ойлат, кӧ-гынат ончыко лектеш, кӧ-гынат изиш почеш кодеш. Икымше КВН-ыште ӧрыктарышыже нимат ыш лий гынат, команде-влак тыгай ӱшаным шочыктышт: марла КВН-лан кокымшо илышым пуаш лиешак.

Мыскара ӱчашымаш мучашлалтмек, жюри член-влак кажне командыланат шке акыштым пуышт. Тӱҥ тыланымаш тыгай ыле: южо командыжлан марий йылмым сайынрак палыме верч, туддене куштылгын кутырымо верч тыршыман; тыгай кугу концертыште кугу сцене гыч шочмо йылмына сылнын йоҥгалтшаш, уке гын эн мотор номержат шке чаплылыкшым йомдара.

А коклаште чапле номер-влак ыльыч. Поснак сайын, икте-весым ешарен, артист семын ММЗ-ын командыже шкенжым ончыктыш, сандене жюри член-влакынат, ончышо-влакынат кумылышт нунын велне ыле; ты командыланак икымше верым пуышт. Мыскара ӱчашымашым сӧрастарыше икмыняр чапле номерат палемдалтде ыш код.