Армийыш каяш повесткым налмеке, рвезе родо-тукымжо деке унала коштын савырнен. Тидлан лӱмын имньым кычкеныт, тудым сӧрастареныт, пӱгешыже оҥгырым сакеныт. Унала пуртымо пӧрт гыч тудым чурий дене Юмылук велыш ончышым, туп дене омсаш луктыныт. Тыге тиде суртыш эше унала толжо манме шонымаш дене ыштыме.

Салтакыш лектын кайыме кечын йӱлам шуктеныт. Эр эрденак, сортам чӱктен, Юмылан кумалын. Ӱстембал тӱрлӧ чеслан поян лийын: кинде сукыр, мелна, пулашкамуно, салмамуно, пура. Нине сий дене салтакым ужаташ толшо еҥ-влакым сийленыт. Кажныже сугыньмутым ойлен, куштылго салтак илышым, пӧртыл толаш кӱчык корным тыланен. Ший оксам кучыктеныт. Юмылан пелешташ толшо карт кугыза киндынерым рвезылан кучыктен.

Салтакыш ужатыме йӱла шкешотан лийын. Рвезе тувыржо дене ӱстел ден пӱкен йолым кылден. Вара, пӱкеныш шогалын, авагаштам, ӧндалмыла ыштен, тусо лончыш ший оксам пыштен. Аваже корныш тичмаш киндым пуэн, ший оксам кидышкыже пышен. Чыла йӱлажат рвезылан порын служитлен, мӧҥгӧ савырнен толаш пиал корным ышта.

Армийыш ужатыме йӱлаште посна рекрут муро нерген палемден кодыман. Ойган муро, ожныракше колышым ужатыме семын йоҥген. Салтак мурышто сай илышлан ӱшаныме кумыл Кугу Ачамланде сар деч вара гына йоҥгаш тӱҥалын. Салтак илыш кызытат неле. Но йÿлам кучышо марий ешлаште ÿшанат, эргым армийыш чыла шот-рат дене ужатет гын, тудо чынак таза пöртылеш.