Пайремын тӱҥ шонымашыже – у кинде лектышым налаш йӧным ыштыше Юмылан тауштымаш: ончыкшымат у куат дене, у шонымаш дене, таза уш-акыл дене илаш йӧным йодыныт.

Угинде еш кумылтыш семын эртен. Ожныракше тудым кажне еш шуктышаш улмаш. Пайрем кечын у шурным йоҥыштеныт, киндым пыштеныт, пурам шолтеныт. Ешыште кугурак еҥже але ӱжмӧ онаеҥ, пырчан терке тӱреш сортам чӱктен, Юмылан пелештен. Тыге у шурным куштымылан, сай игечым колтымылан тауштеныт, ешлан тазалыкым, кинде перкем, шурным сайын поген налаш йӧным йодыныт.

Марий калыкын тиде пайремже кызытат эртаралтеш. Икмыняр ий почела тудо Йошкар-Олаште лиеш, регион-влак кокласе пайрем семын эрта. Тушто Юмылан пелештыме йӱлам онаеҥ-влак шуктен шогат, у шурно гыч шолтымо пучымышым, киндым шнуяҥдыме йӱла шукталтеш.