Йодыш-влакым Марий шанче институтын пашаеҥже-влак ямдыленыт. 18 гыч 20 октябрь марте викторинын 27 йодышыштлан 13 вашмут пурен. Тиде – Галина Жилкина, Елена Ласточкина, Надежда Годунова, Алеся Иванова, Елена Никитина, Людмила Волкова, Ольга Казанцева, Светлана Таныгина, Тамара Степанова, Татьяна Пантелеева. Тыгак Оршанке районысо Кугунур кыдалаш да Советский районысо Кукмарий тӱҥ школ-влакын юнкор кружокышт да Звенигово районысо Красногорский поселкысо 2-шо номеран кыдалаш школын 9 классыште тунемшыже Валерия Пакалина ушненыт.
Сеҥышыш Кугунур кыдалаш школын юнкор кружокшо лектын. Тудым марий йылмым туныктышо Людмила Геннадьевна Елькина вуйлата. Тунемше-влак кажне йодышлан чын вашештеныт да вашмутыштым фотосӱрет дене пеҥгыдемденыт.
Сеҥыше-влакым таче, 21 октябрьыште, МарНИИЯЛИ-ште эртыше «Современная литература народов России. Художественная публицистика» антологийын презентацийже годым кучыктымо. Людмила Геннадьевна мероприятийыш уста юнкоржо, мураш-кушташ йӧратыше, «Шонанпыл» йоча куштышо ансамбльын чолга участницыже Ксюша Богданова дене толын.
«Юнкор кружокыш 15 тунемше коштеш, – палемдыш Л. Елькина.– Йоча-влакын возымышт тӱҥ шотышто «Вперед» районысо газетыште савыкталтеш. Марий йылме дене ик лаштык савыкталтеш. Тыгак «Ямде лий» дене кылна пеҥгыде, «Кече» журналыштат лектеш. Йоча-влак рушла да марла возат. Пашанам школ пеленысе «Шонанпыл», театральный кружок дене пырля эртарена. Марий йылме деке йочам савыраш уроклаште интерактивный модыш-влакым эртарена, викторинылан вашмутым фотосӱретлан эҥертен кычалына. Тыге йоча шонаш, шинча ужын тунемеш. Финн-угор калык-влакын кечыштлан пӧлеклалтше онлайн-викториныш кумылын ушнышт, кӱчык жапыште ыштен шуктышна. Тау, пашанам кӱкшын аклымылан».
