Марий Элыште самырык-влаклан «Единство в дружбе» XI фестиваль умбакыже шуйна. 6 ноябрьыште Самырык-влакын полатыштышт калык модмаш-влак эртеныт.
Марий тӱвыра рӱдер Чодыра озанлык техникумын студентше-влакым марий калык модыш-влак дене палдарен. Тидым Салика (Ксения Никифорова) ден Эчук (Сергей Карпов) ыштеныт, «Палыме лийына», «Йыдал дене модмаш» «Ӱштым кырен модмаш» модыш-влак дене модыктеныт. Тыгак студент-влак, марий кундемнан мотор вершӧрлаже-влак нерген йодышлан вашештен, пӧлекым модын налыныт. Мероприятийым йыр куштымаш дене мучашлыме.