Йошкар-Олаште школышто тунемше-влаклан республик кӱкшытан «Мунло» уш-акыл марафон эртен. Тудо Марий Эллан 104 ий теммылан да Ешын идалыкшылан пӧлеклалтын.
Таҥасымаште рӱдола да куд районысо школла гыч 15 команде лийын. Участник-влак кум тематический турым эртеныт. Чумыр налмаште нуно 36 йодышлан вашештеныт, тыге марий калыкын кумдан палыме еҥже-влакым, йылмыжым, сылнымутшым, историйжым да йӱлажым палымыштым ончыктеныт. Йодыш-влакым Йылмым, литературым да историйым научнын шымлыше В.М.Васильев лӱмеш марий институтын кугурак научный пашаеҥже-влак Надежда Федосеева ден Сергей Свечников, тыгак Марий кугыжаныш университетын преподавательже, профессор Галина Шкалина ямдыленыт. Марафонышто нунак эксперт лийыныт да участник-влакын сайын шонен моштымыштым палемденыт.
Эн шуко баллым Советский районысо Ургакш лицейын «Ургакш еш» командыже поген да 1-ше верым сеҥен налын.
Кокымшо ден кумшо верлаш Морко районысо Зеленогорский школын «Эрвий»
ден Кужэҥер районысо Руш Шой школын «Одар тукым» командышт лектыныт.
Кажне командылан таумутым, изирак кубокым да пӧлекым кучыктымо. Сеҥыше команде-влакым диплом, кубок да пӧлек дене палемдыме. Туныктышо-влаклан уш-акыл модмашыш йоча-влакым ямдылымыштлан изирак пӧлекым – блокнотым – кучыктымо.
Ушештарена, «Мунло» марафон Марий Эл Тӱвыра, савыктыш да калык-влакын пашашт шотышто министерствын полшымыж дене Марий тӱвыра рӱдер 2014 ий гыч эртара.
Галина Шкалина, эксперт, «Марий йӱла» турлан йодышым ямдылыше:
«Мунло» марафон – уш, шонымо, пырля лийме пайрем. Тушто марий калыкын тӱвыраште моткоч кугу верым налын. Таче шижда, очыни, шола могыр дене шонаш тунемынна. Рушла ойлаш гын, левополушарный мышлений. А вот пурла могырым шагал кучылтына. Туштым пален налаш фантазий, тӱрлӧ таҥастарымашым кучылтман.
Тушто дене пашам ыштымаш – вуйдорыкым тарватылмаш. Шола могыр вуйдорык шонаш, тунемаш, тура кошташ полша. А пурла могыр вуйдорык – сӱретлаш, мураш, кушташ, икманаш, усталыклан туныкта».
Надежда Новикова, Морко районысо Арын школ директорын советникше:
«Ме икымше гана интеллектуал марафоныш ушненна. Кудымшо классыште тунемше-влак толыныт. Изирак улыт, южо йодышыжым пален кертын огытыл, эше тунемын огытыл, но шинчашт йӱлен, икте-весышт дене ӱдыр-влак каҥашеныт. Тӱшкан пашам ыштен моштымылан тунеммаш кажне коллективыште кӱлеш.
Келшыш мыланем «Падыраш» йоча ансамбльын выступленийже. Мый шкеже сем тӱня гыч ялысе школыш толынам. Музыкальный училищым, консерваторийым тунем лектынам, домра дене шоктем. Семӱзгар дене шоктышо, мурышо йоча ансамбльым погаш шонымаш уло. Илышыш пурташ шонем».
