13 декабрьыште Марий тӱвыра рӱдер 25 ияш лӱмгечыжым чапле концерт программе дене палемдыш.
Ныл шагат кайыше пайрем касыште 13 усталык коллектив, 11 мурызо ден гармоньчо-влак шке мастарлыкыштым ончыктышт. Нунын коклаште Марий тӱвыра рӱдерын усталык коллективше-влак лийыныт.
Концерт кок ужаш дене эртен. Икымшыште саламлымаш мут-влак памаш вӱдла йогеныт. Эн ончыч Марий Эл Республикын Кугыжаныш погынын вуйлатышыже Михаил Васютинын саламмутшо йоҥген. Тӱвыра, печать да калык-влакын пашашт шотышто министрын алмаштышыже Игорь Садовин рӱдерын 25 ияш пашажлан кугу акым пуэн, рӱдер лӱмеш министерствын Чап таныкшым вуйлатыше Ирина Якаевалан кучыктен. Тиде Чап танык – тӧнежыште чырык курым жапыште пашам ыштыше кажне еҥын саскаже. Тыгак Чап танык дене методист Эльвира Петрова, а таумут дене методист Сергей Карпов палемдалтыныт.
Рӱдерым да тушто тыршыше коллективым руш да татар рӱдерым вуйлатыше-влак Наталья Наумова ден Ильгис Гайсин, Калык усталык рӱдерым вуйлатыше Эльвира Куклина, В. Васильев лӱмеш Йылмым, историйым да сылнымутым шымлыше марий шанче институтын директоржо Людмила Григорьева, азербайджан да Дагестан калык-влакын диаспорыштым вуйлатыше Мераб Беришвили ден Муса Моллачиев толыныт.

Рӱдер ден марий журналист-влакым 25 ияш калыкнан шамжым нӧлтымӧ, тӱвырам вияҥдымаште пырля тыршыме сомыл да келшымаш ушат. Нуно рӱдерын мероприятийлаже нерген серен шогат. Тидын нерген шке саламмутыштышт Марий книга савыктышын директоржо Эдуард Иманаев, «Марий Эл», «Кугарня», «Ямде лий» газет-влакын тӱҥ редакторышт Светлана Пехметова, Ирина Степанова, Людмила Григорьева, «Ончыко» журналын тӱҥ редакторжо Игорь Попов ойленыт. Марий предприниматель Ольга Аптышеват поро шомакым ойлен.

Марий Элын Виче кундемыште ӱшанъеҥже Александр Макаров марий тӱвырам, йылмым да йӱлам арален да шарен шогымаште рӱдерын пашажым кӱкшын аклен. Тиде кундемыште тӧнежын пашаеҥже-влак Пеледыш пайремым, моло йӱла пайремым эртарымаште кугу полышым пуэныт, усталык лабораторийым эртареныт.

Рӱдерын вуйлатышыже Ирина Якаева чылалан кугу таум ыштен, марий калыкнан шкешамжым нӧлтымаште, тӱвырам кызытсе жапын йодмыжлан келшышын, тыгодым марийлык тӱсым арален кодаш манын, ончыкшымат тыршаш палемден.