Марий предприниматель Ольга Аптышева калыкнан тӱвыражым, йӱлажым арален да шарен шогымаште кугу сомылым шукта.
Шочынжо Урал кундемыште, шкевел марий калык вургемым поген, тӧрлатылеш.
Марий тӱвыра рӱдерлан 25 ияш лӱмгечыжлан пӧлеклалтше пайрем касыште Ольга Борисовна ача-аважын тувыржым, шкенжын йыланжым (шовырым) пӧлеклыш.
«Рӱдер моткоч поро сомылым тӱҥалын. Оласе да районласе школлаште «Марий калыкын поянлыкше» этноурок-влак эртаралтыт. Тушто калык вургем, семӱзгар нерген каласкалыме гоч марий калыкнан чон поянлыкшым, тукым серлагышыжым шергалыт. Шкежат этноурокышто урал марий вургем нерген каласкаленам. Таче, пайрем кас дене пайдаланен, рӱдерлан авамын 90 ий ончыч шке куэн, тӱрлӧ вож да кушкылым кучылтын, шӱртыжым чиялтен, куэн, ургымо тувыржым пӧлеклем. А ачамжын тувыржылан 70 ий. Мутат уке, жап дене нуно изиш шапалгеныт, сандене тӧрлатылынам, тасмам, тыгыде шерым кучылтын моторештенам. Тек тиде пӧлекем самырык тукымым марий тӱвыра деке лишемдымаште порысшым шукта», – палемдыш О.Б. Аптышева.
Ольга Борисовнан пӧлекше – рӱдерын пашаштыже кугу полшык. Тудлан кугу таум ойлена, тек пашаже ончыкшымат волгалтеш.