22 декабрь – марий Йӱштӧ Кугызан кечыже. Лач тиде кечын, 12 ий ончыч, тудлан илыме вержым палемдыман паспортым кучыктымо.
Тыгеже Йӱштӧ Кугыза 10 курым ожно шочын. Шочмо верже – марий мланде. Паспортым Шернур район администрацийын тӱвыра пӧлкаже ямдылен.
Йӱштӧ Кугызан илемже – Марий Элын эн йӱдвелыште верланыше Кукнур кундем. Историк Руслан Бушковын возымыжо почеш, Йӱштӧ Кугыза лач тиде селаште илен. Ешыжат уло: ватыже Йӱштӧ кува, Поран эргыже, Теле ӱдыржӧ да Лумӱдыр уныкаже. Пайрем годым нуно куаным да юзо шӱлышым кондат. Шке илемыштыже юзо виян тиде еш уна-влакым порын вашлийыт, марий модыш да йӱла дене палдарат, команмелна дене шокшо чайым темлат.