24 декабрьыште Республикысе курчак театрыште «У ий йомак» республикысе йоча пайрем моткоч веселан эртен.
13 район да кок ола гыч 288 йоча ача-авашт да туныктышышт-влак дене пырля У ий пайремыш погыненыт. Ийготышт шот дене 6 гыч 15 ияш марте улыт.
Нуно – марий йӱланам да йылмынам аклен кушшо алмаштышна улыт манаш лиеш. Школ, район да республик кӱкшытыштӧ эртаралтше мероприятийлаште чолгалыкым ончыктеныт, тӱрлӧ конкурсышто сеҥышыш лектыныт, мер пашаштат активист улыт.

Пайремын унаже-влакым оҥай программе вучен. Марий талешке Алан да Лумӱдыр дене пырля нуно йомакысе герой-влакын йоҥылышыштым сай кумыл, муро, куштымаш да модыш-влак гоч умылаш да тӧрлаташ полшеныт, пайремыш Йӱштӧ Кугызалан толаш полшеныт, У ийын тӱҥ юзыеҥже деч шокшо саламлымашым налыныт. Йӱштӧ кугыза кажныштлан шере пӧлекым кучыктен.

Марий У ий елкым Марий тӱвыра рӱдер ятыр ий эртара, марий йылмым палыше, тӱвырам саклыше йоча-влакым У ий пайремыш шукырак ушаш манын, конкурс-влакым увертара. Теният онлайн йӧн дене «Йӱштӧ Кочайлан мурем» муро, «У ий модыш» да «Йӱштӧ Кугызалан серыш» конкурс-влакым эртарен. Тушко чылаже 112 паша пурен. Сеҥыше-влаклан Йӱштӧ кочай ден Лумӱдыр Чап таныкым да пӧлекым кучыктеныт.

Курчак театрын артистше-влак «Лумышто пырысиге» (Котенок на снегу») спектакльым ончыктеныт.