Йоча да самырык-влаклан «Шочмо йылме – калыкын поянлыкше» фестиваль кокымшо гана тений эртаралтын. Морко районысо Коркатово лицей фестивальыш толшо-влакым порын вашлийын.

Кандаш классыште урок-влак лийыныт. Тудым Марий Элыште кумдан палыме туныктышо-влак эртареныт. Лӱмыштым палемденак кодыман: Аркадьева Нина Вениаминовна, Кокласола школ, Григорьева Елена Валерияновна, Шӱргыял школ, Марий Элын калык туныктышыжо Софья Васильевна Никитина, Морко поселкысо 1-ше номеран школ, педагогике шанче кандидат, Марий Элын образованийын сулло пашаеҥже Иксанова Лидия Геннадьевна, Йошкар-Оласе тӧнежлаште марий йылмым туныктышо-влак Петрова Эльвира Владимировна, Никитина Людмила Николаевна ден Дмитриева Эльвира Николаевна. Нуно уроклам эртараш тӱрлӧ темым ойырен налыныт: ача-ава ден йоча кокласе проблеме, самырык тукым нерген, марий сылнымутым лончылымаш да тулеч молат.

Калык писатель Зоя Дудина лицейысе юнкор-влак дене С. Чавайнын калык пӱрымаш нерген «Ото» почеламутшым лончыленыт.

Фестивальыш Морко районысо школласе туныктышо-влак ушненыт. Нуно тунемше-влак дене пырля уроклаште шинченыт, шке коллегышт-влакым тунемше-влак дене вашмутланымашым эртарыме йӧным куанен онченыт. Теве икмыняр туныктышо Зоя Дудинан урокыш пурен, тунемше-влак дене пырля марий поэтын «Ото» почеламутым лончылымашке ушненыт, эсогыл тӱшкан почеламутым возеныт. Тунемше-влакынат мут аршашыш шочын.

Саламлымаш мутым Морко районысо туныктыш пӧлкам вулатыше Аблинова Эмма Эриковна, Коркатово лицейым вуйлатыше Михайлов Сергей Изосимович, Коркатово ял шотан илемым вуйлатыше Павлов Владимир Альбертович да Марий тӱвыра рӱдерым вуйлатыше Якаева Ирина Геннадьевна ойленыт. Туныктышо-влак тунемшышт-влак дене пырля урокышто налме шинчымашыштым муро, почеламут гоч почын пуэныт. Концерт программыште Коркатово лицейын тунемшыже-влак, Марий тӱвыра рӱдерын мурызыжо-влак мастарлыкыштым ончыктеныт.