Ош Кугу Юмо , Ӱярня кугу юмо, йӧратен лийын шогыза, серлаген шогыза, алал лийже. Ош ӱстембал шовычетым кум мелла шаралтен, тичмаш чесетым поген шынден, тичмаш кинде сукырет, ӱян эгерчет, тичмаш ӱян туарат дене, салмавушет, тӱрлӧ пучымышет, шӱр лемет дене, шӧр-ӱмбал шӧрет дене, ӱй кӱмыжет дене, мӱй кӱмыжет дене, шыл когылет дене, саска шорва сортат дене мемнан пелештен шогымына ашеш кайыже.
Перке юмо, тӱрлӧ-тӱрлӧ перкетым виктарен шого. Ӱярня арня пайремет дене куандарен илаш серлаген шого, Юмо кумалме чӱчӱ-чӱчӱньо-шамыч дене, тичмаш чесет дене, вашталтен кумалын, пелештен шогымет дене йӧратен лийын шогыжо. Ӱдыр-каче йӱын-кочмо шогымыж дене модын воштылмо дене йӧратен лийын шого, серлагышым пу. Йолварат дене модын-воштылын мунчалтымет дене куандарен шого. Ӱдыр ден качым ваш ушен шого, Ӱярня кечет дене, леве луметым кондымет дене, кеҥеж кечын леве йӱретым кондымет дене куандарен илаш серлаген шого. Осал озыркан мардеж деч, осал тул ойып деч аралтышым ыштен шого. Мыйын пелештымем ашеш кайыже, юмо-суксо, виктарен шого, саска сорта шуктен виктарен шого. Алал лийже.
«Ош Сандалык ончылно» книга гыч налме.