«Ӱярня» пайрем шушаш рушарнян, 2 мартыште, мучашлалтеш. Марий тӱвыра рӱдер каныш кечылаште Ӱярням кок вере пайремлаш тӱҥалеш.
1 мартыште йоча-влаклан тудо эртаралтеш. Ӱярня – икшыве-влаклан куаным кондышо пайрем. Арня жапыште йоча-влак курык гыч тӱрлӧ семын мунчалтеныт: издер, ече дене, а модышыжо мыняре вучен! Эсогыл ожныракше ача-ава-влак мӧҥгысӧ сомыл деке шагал годым ушеныт, молан манаш гын тиде пайрем годым юарлен модмаш тазалыкым пеҥгыдемда шоненыт.
Марий тӱвыра рӱдер тиде йӱлам илышыш пурташ тений луымшо гана «Йоча Ӱярням» эртара. Республикысе 13 школ гыч тунемше-влакым Йӱштӧ кугызан резиденцийже да Кукнур кыдалаш школ порын вашлийыт. Тунемше-влак «Чевер Ӱярня» конкурсышто «Ӱярня кува», «Ӱярня мелна», «Ӱярня такмак-влак» заданий-влакым шуктат. Тыгак Йӱштӧ кугыза да Лумӱдыр тыланыме шомакым каласат.
Модыш алан Ӱярня пайрем годым эртарыме модыш-влаклан поян лиеш: вӱдвара дене лумым, салмавондо дене «мелнам» ӱчашен нумалыт, маскайол дене кошташ, шӱшканъече дене тӱшкан мунчалташ, «карта паҥгала» модаш, кандырам шупшаш тӱҥалыт. Резиденцийыште верланыше курыкышто мунчалташ йӧн лиеш. Тыгак йоча-влакым ӱярнявара вуча, тудым корем тайылеш пайремлан пыштыме.
2 мартыште икымше гана Йошкар-Оласе Марий парк калыкым Ӱярня пайремыш чумыра. Мероприятийлан тӱҥалтышым таҥошкылмаш ышта. Ӱярня годымсо «Ӱдыр йӱыш» йӱлам Куженер районысо Йывансола тӱвыра пӧртын «Мурсескем» калык фольклор ансамбльже ончыкта.
«Ӱярня кочкыш» конкурсышто пайрем сийым ямдылыме да палдарен моштымо дене Куженер велысе «Ший аршаш», Параньга кундемысе «Чон оҥгыр», Морко велысе «Весела кумыл», Советский могыр гыч «Шуар кундем», Йошкар-Ола гыч «Ший полан» да «Ныжыл сем» палдарат. Ӱярнян озаже – мелна, тыгак марий калык тиде пайремлан эн тутло чесым пога: команмелнам, ӱячам, тувыртышым, пулашкамуным,
Концерт программым Куженер, Параньга, Советский, У Торъял, Морко, Медведево да Йошкар-Оласе фольклор, вокал да куштышо коллектив да посна мурызо-влак сӧрастараш тӱҥалыт.
Пайрем тыгак калык модмашлан, мунчалтыме йӱлалан поян лиеш. Вет арам огыл марий-влак муралтат: «Ӱярня толеш мунчалташ».