Министерствын ведомствышкыжо пурышо икмыняр учрежденийын вуйлатышыштым вашталтыме нерген приказым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов подписатлен.
И.С.Палантай лӱмеш тӱвыра да сымыктыш колледжым вуйлатыше Алексей Паскичев Я.Эшпай лӱмеш Марий кугыжаныш филармонийым вуйлаташ тӱҥалеш.
А ты учрежденийым 2020 ий гыч вуйлатыше Андрей Пуртов Марий самырык театрыш директорлан кусна.
Т. Евсеев лӱмеш национальный тоштерым кандаш ий наре вуйлатыше Светлана Зверевалан тӱвыра да сымыктыш колледж вуйлатышын сомылжым жаплан шукташ ӱшаненыт.
Тоштерым але марте Марий тӱвыра рӱдер директорлан ыштыше Ирина Якаева вуйлаташ тӱҥалеш. Рӱдерым Марий самырык театр директор Александр Бирюковлан вуйлаташ ӱшаненыт.
У верыште вуйлатыме пашам 1 апрель гыч тӱҥалыт, воза «Марий Эл» газет.