Мероприятий чылаже 1200 еҥым ушен.
Тушто 27 йылмын ямже, калыкын илыш-йӱлаже да тӱвыраже, шочмо элын але кундемын сӧраллыкше дене палдареныт. Тиде – англичан, француз, азербайджан, узбек, туркмен, афган (пушту да фарси), араб, корей, татар, таджик, чуваш, удмурт, мордва, финн, коми, карел, турецкий, итальян, эстон, немыч, испан, персид, хинди, ханты йылме-влак. Марий Элын кугыжаныш марий да руш йылме-влакым виш урок семын эртарыме.
Кодшо ийысе семынак тений фестиваль офлайн да онлайн йӧн дене эртаралтын. кокымшо йӧнжӧ дене ялысе школлаште тунемше-влак пайдаланеныт. Районла гыч 9 школ финн-угор калык-влакын йылмышт дене палыме лийыныт, шочмо марий йылме деке лишыл улмыштым шижыныт, тыгак куштымашын, вургемын йылме ойыртемыштым да икгайлыкыштым пален налыныт.
Марий ӱдыр-рвезе-влак вес калык йылмымат сайын палат. Валентина Семенова эстон йылмын сӧраллыкшым почын пуэн, Надежда Имаева финн йылме, финн калыкын тӱвыраже нерген каласкален. Валеа але Валентина персид йылмым сайын пала, иран рвезылан марлан лектын. Йот эл гыч толшо студент-влак шочмо йылмышт, шке калыкыштын тӱвыраштым почын пуаш кумылан улыт. А испанец Висенте Аикса Марий Элыш толын. Икымше гана «Lingva-Территорий» йылме фестивальыште шочмо йылмыж нерген каласкален.
«Ме Чуваш университет гыч толынна, — каласыш И.Н. Ульянов лӱмеш Суваг кугыжаныш университетын руш да чуваш филологий ден журналистике факультетын деканже Алена Иванова каласыш. – «Чувашский – чемоданыште» проект дене палдарышна. – Проект кок ий пашам ышта. Тиде жапыште 500 урокым школлаште, колледжлаште пуэнна, Йот эл гыч толшо студент-влак кумылын тунемыт. Йылме фестиваль калык коклаште келшымаш кылым ышташ полша, самырык-влакым эсогыл шке кугезе тукымыштын йӱлажым вес шинча дене ончалаш да аклаш туныкта».
Марий кугыжаныш университетын ректоржо Михаил Швецов чемоланым почын ончале да каласыш: «Пенгыде шинчымашым пуышо чемодан».
«Кӱлешан пашам шуктеда, — палемдыш Висенте, — мыняр тӱрло калыкым тудо ушен! Тыште — калык-влакын келшымаш тулышт йӱла».
Индий калыкын ӱдыржӧ Бхавна Кочрекар дене икмяныр ий палыме улына, эсогыл ола уремыште шыргыжал саламлалтына.
«Вич ий шочмо хинди йылмем дене фестиваль кышкарыште палдарем. Тыште тунемам, шочмо элна деч тораште илем гынат, йолташем дене пырля Йошкар-Олаштат калык пайремнам эртарена. Вожым йомдарыман огыл, — манеш Бхавна.
«Чын, кугезе калыкнан вожшым палыман. Фестивальын логотипшым мый тыге ужам, — палемдыш Россий сулло, Марий Элын калык художникше Иван Ямбердов. – Илышыште ниможат тыглай огеш лий. Калык-влакын ушен кертше вожым ужын моштыман».
Йылме фестивальын презентаторжо да слушательже-влакым Марий Эл Республик Виктер вуйлатышын икымше алмаштышыже Михаил Васютин, Марий кугыжаныш университетын ректоржо Михаил Швецов, Марий тӱвыра рӱдерын вуйлатышыже Наталья Пушкина, Марий Элын калык-влак Ассамблейжын вуйлатышыже Лариса Яковлева саламленыт.
Фестиваль «2013-2025 ийлаште Марий Эл Республикын кугыжаныш национальный политикыже» кугыжаныш программым илышыш шыҥдарыме кышкарыште эртаралтын.
Мероприятийым Тӱвыра, савыктыш да калык-влакын пашашт шотышто министерствыже да Марий кугыжаныш университетын полшымышт дене Республикысе марий тӱвыра рӱдер эртарен.
