Марий тӱвыра рӱдерын увертарыме «Ӱярня пайрем» сӱрет конкурсыш 37 тунемше ушнен ыле. Нуно Параньга, У Торъял, Куженер, Шернур, Марий Турек районласе школлаште тунемыт.

«Ӱярня курыкышто» – тыге лӱмден шке пашажым Куженер район Шӱдымарий школын тунемшыже Кристина Щербакова. Тушто сӱретче ӱдыр ӱярнавара дене мунчалтыме татым почын. Лач Ӱярня годым мужыр дене мунчалтеныт. Тидын годым Кристина калык вургемжым почын пуэн. Коеш, ӱдыр йӱла пайрем ойыртемым пала. Тудын пашажым 1 вер дене аклыме.

2 верыш Шернур район Лажъял школ гыч Анна Абрамова ден Параньга школ гыч Ксения Харитонова лектыныт.

Параньга район Пумарий школ гыч Софья Веселова ден У Торъялысе школ-интернатын тунемшыже Максим Беляев кумшо верыш лектыныт.