Кеҥеж – йоча-влаклан весела, каныме пагыт! Таче, 5 августышто, марий тӱвыра рӱдерын специалистше-влак, Марий кугыжаныш университет пелен пашам ыштыше йоча лагерьыш, «Марий йылме аршашыш» оҥай программе дене миеныт.

Йоча-влаклым марий калыкын поян тӱвыраж дене палдаренна, йӱла нерген каласкаленна, муро-влакым йоҥгалтаренна да моло калык дене ваш келшен, пагален илаш кӱлмӧ нерген мутланенна. Йоча-влак мастер-класслаште уло кумылын ушненыт, марий шомакым тунемыныт да весела марий сем почеш куштеныт!

Вашлиймашна — тиде весела кумыл веле огыл, тыгак йоча-влаклан шке тӱвыраштым йӧраташ да моло калыкым пагалаш кумылаҥдаш йӧн. Вет лач келшымаште да икте-весым умылымаште кугу элнан вийже! Лагерь организатор-влаклан мемнам вашлиймыштлан да марий культурын ик ужашыжым пайлаш йӧным ыштымыштлан таум ойлена! У вашлиймашым вучена да умбакыже пайдале вашкыллан ӱшанена!