1973 ийыште Саламатнур 8-ияш, 1975 ийыште Руш Шой кыдалаш школым тунем пытарен. 1975—1980 ийлаште Марий кугыжаныш университетын историй-филологий факультетшын марий филологий пӧлкаштыже тунемын.
Университетым тунем лекмек, паша корныжо эртак журналистике дене кылдалтын. 1980 ий кеҥежым Кужэҥер районысо «Ӱжара» газетыште ондак кусарышылан, вара корреспондентлан пашам ышташ тӱҥалын. Варажым тудо Йошкар-Олаште республик кӱкшытан тӱрлӧ газет ден журнал редакцийлаште, Марий телевидений ден радиошто тыршен.
2003 ий август гыч 2010 ий апрель марте Чукотко автоном округысо икмыняр район газет редакцийыште тыршен, корреспондент, «Крайний Север» издательствын Чаунский ден Беринговский районласе филиалыштын директор-редакторышт лийын. Чукотко автоном округ Губернаторын Чап грамотыж дене палемдалтын (2008).
Икымше почеламутшо 1973 ий 17 мартыште Марий АССР-ыште йоча-влаклан лекше «Ямде лий» газетеш савыкталтын. Тудо «Март» маналтын. Тылеч вара поэзий корныжо эре вийнен толын. 1982 ийыште «Кинде-шинчал» тӱшка ойпогышто поэзий аршашыже лектын, вара марла «Чытамсыр курым» (1987), «Нумалтыш» (1983), «Шӱмсавыш» (2008), «Илышпӧрдем» (2018), рушла «Светом единым» (2003), «Всполохи сердца» (2014), «Припадаю к истокам» (2023) поэзий книгаже-влак ош тӱням ужыныт.
Г. Сабанцев 1984 ий май тылзыште Москваште Самырык литератор-влакын VIII Всесоюзный семинар-каҥашыштышт лийын. Тудын возымыжым палыме совет поэт-влак Н. Доризо, В. Гордейчев, В. Берестов онченыт да поро мутым ойленыт. Рушлаш кусарыме почеламутшо-влак Москваште, Ижевскыште, Анадырьыште лекше поэзий книгалаште, 2017 ийыште Российысе поэт-влакын Москваште лекше «Поэзия» лӱман альманахыштышт савыкталтын. Поэтын посна почеламутшо-влак одо, мордва, татар, чуваш, тува, белорус, эстон, финн да венгр йылмылаш кусаралтыныт.
Г. Сабанцев-Ояр рушла сылнымутым марлашке мастарын кусарыше семынат палыме. Марлаҥдыме кугу пашаже — А. Твардовскийын «Василий Тёркин» ден “Тёркин вес тӱняште” поэмыже-влакым кусарымаш. Марий поэт Россий Федераций тӱвыра министерствын «А. Твардовский. 100 лет» шарнымаш медальже дене палемдалтын. Татарстанын калык поэтше Р. Миннуллинын «Кумыл сабантуй» поэзий книгажым марла лукмаште кугу надырым пыштен (2013). Марлашке драматург-влак В. Гуркинын «Саня, Ваня, с ними Римас» («Вучо, мане, пӧртылам…»), «Любовь и голуби» («Йӧратымаш да кӧгӧрчен-влак»), Н. Колядан «Баба Шанель» («Шанель Тарля»), А. Островскийын «Правда — хорошо, а счастье — лучше» («Чын улат — сай, пиалан гын — сайрак»), Ф. Шиллерын «Коварство и любовь» («Осал чоялык да йӧратымаш»), венгр драматург Чаба Секейын «Цветок шахт» («Илена-йӱлена») пьесыштым, «Биармия» («Вий-Ар — ме») карел рок-оперын либреттожым кусарен. Чылажат М. Шкетан лӱмеш Марий кугыжаныш драме театрын сценыштыже шындалтын.
2017 ийыште Москваште эртыше Россий кӱкшытан «Красная гвоздика» фестивальын лауреатше лийын. Марий эстраде мурызо Э. Попова тушто композитор В. Кульшетовын Г. Оярын мутшылан возымо «Ӱмыр кас» мурым йоҥгалтарен. Каласаш кӱлеш, поэт Г. Оярын мутшылан композитор-влак 100 наре сылне мурым сереныт, нуно эфирыште да сценыла гыч чӱчкыдын йоҥгалтыт, колыштшо-влакын кумылыштым савырат.
Г. Сабанцев-Ояр — Марий Элын сулло журналистше (1999), Марий Элын калык поэтше (2015), С.Г. Чавайн лӱмеш Кугыжаныш премийын лауреатше (2019).
