Ялысе да оласе школлаште тунемше-влакын гармонь, марий семӱзгар деке мелын улмышт тӱрлӧ мероприятийым эртарыме годым шинчалан перна. «Самырык тукым», «Пеледше тукым» конкурс, «Йоча У ий», «Йоча тӱня» пайрем-влак, Пеледыш пайрем годым шоктен-мураш кумылан-влак лектынак шогат. А мыняр уста йочаже тыгай пайремышкыже огеш логал? Сандене, тидым шотыш налын, «Изи гармоньчо» фестивальым эртараш да тушко гармоньым шоктышо йоча да самырык-влакым веле огыл, калык семӱзгар дене шоктышо-влакым ӱжаш палемдыме. Йодмаш-влак Марий Эл гыч куд да Пошкырт кундем гыч кок район пуреныт.
Марий самырык театрын сценыш вӱдшорын 22-шо кечынже Марий Турек Арбор кундем гыч Ростислав Васинкин, Башкортостан республик Калтаса район Амчемучаш ял гыч Иван Петраев, Мишкан район Ардаш ял гыч Дарья Хамитова, Звенигово район Красногорский поселко гыч Кирилл Иванов, Марий Турек район Кугу Карлыган села гыч Максим Михайлов, Йошкар-Ола гыч Артем Ягодаров, Игнат Бирюков, Михаил Сидоров, Макар Бусыгин, Параньга район гыч Эрвин Морозов, У Торъял район гыч Иван Ягодаров, Волжский район гыч Тимофей Тарасов ден Алексей Крылов гармонь да тальянке дене шоктен муралтымышт дене куандарат.
Мишкан район Ардаш ял гыч «Памаш», Волжский район Упшер кундем гыч Яранцевмыт, Параньга район Йырмучаш ял гыч Гордеевмыт еш ансамбльышт выступатлаш тӱҥалыт.
Йошкар-Ола гыч «Падыраш» йоча фольклор ансамбль, Тӱвыра да сымыктыш колледжын, Советский район Кельмаксолан гармоньчжо-влак Мишкан район Ардаш ял гыч «Акарт» фольклор ансамбль мастарлыкым ончыктат.
Кӱсле дене шоктышо кум коллектив сценыш лектыт. Тиде – «Интеллектуал» АНО пелен чумырымо «КӱслеКыл» усталык студий да «Шийгорно» кӱслезе ансамбль, тыгак – Звенигово район Кужмара села гыч «Йоҥгалтыш» коллективын кӱслезыже-влак. У Торъял район гыч самырык баянист, совлаче да мурызо-влак сценым сӧрастарат.
Марий Турек район Кугу Карлыган села гыч баянист-влак Максим Михайлов, Кирилл Семенов, Руслан Пчельников усталыкышт дене палдарат.
Фестиваль шушаш шуматкечын, 22 апрельыште, Марий самырык театрын сценыштыже эрта. 14 шагатлан тӱҥалеш.
Пагалыме марий-влак, чыладам пагален вучена.
