Российын калык-влакын пӧртыштын вуйлатышыже Анна Полежаева саламмутшым колтен. Тӱвыра, печать да калык-влакын пашашт шотышто министрын алмаштышыже Игорь Садовин, Финн-угор калык тӱвыран Поволжский рӱдерын пӧлка вуйлатышыже Валентина Дыдыкина пайрем дене саламленыт, калык-влак коклаште келшымаш кылым ончыкшымат пеҥгыдемдымаште мероприятийын кӱлешлыкшым палемденыт.
Кызытсе жаплан келшыше у технологийым моштен кучылтмылан кӧра Россий кумдыкышто илыше родо-тукымна деке виртуально миен толаш йӧн лийын. Карелий гыч «Тойве» калык сем ансамбль, Коми кундем гыч «Зарни туис» калык сем ансамбль, ХМАО-Югран калык усталык Окружной пӧртын «Ёмвош ёх» фольклор студийже, Одо кундемын «Быгы» удмурт тӱвыра калыкле рӱдержын «Зоринча» вокал ансамбльже родо-тукым кече дене саламлымашым ыштеныт, муро да куштымаш дене палдареныт. Тыгак финн, коми, венгр йылме дене муро да почеламут-влак йоҥгеныт. Тудым Россий Федерацийын сулло, Марий Элын калык артистше Зоя Берникова, Марий Элын тӱвыран сулло пашаеҥже Эльвира Петрова, О. Ипай лӱмеш премийын лауреатше, композитор Светлана Яндукова, самырык мурызо Даниил Коротков, М. Шкетан лӱмеш Марий нацональный драме театрын артистше-влак Марина Воронцова ден Иван Соловьев, «Падыраш» йоча, «Чон оҥгыр» фольклор, «Онар» куштышо ансамбль-влак йоҥгалтареныт.
Филолог Надежда Имаева марий поэт В. Колумбын «Мыйын лу илышем лиеш гын…» финн йылме дене лудын. Марий поэтессе Альбертина Иванова коми, финн да мордва поэт-влакын кусарыме почеламутыштым марла лудын.
Мордва Республик Большеберезовский район гыч «Парынза» калык ансамбль, кужу корным ончыде, Йошкар-Олаш толын. Вургемышт, мурышт гоч шке кугезыштын йӱлаштым почын ончытеныт. А мурышт марийынла шокта: сӱан мурышт Пермь кундем Суксун велне илыше марий-влакын семыштым ушештара. Арам огыл, очыни, ме, кок калык, поволжско-финн подгруппыш пурена.Пошкудо республик гыч Марий Элыш «Кой» «Этношкол» туныктымо проектым конденыт. Мордва тӱрызӧ, историй шанче пашаеҥ Вера Ковалева парня дене тӱрлӧ тӱсан шӱртӧ гыч ӱштым пидме дене мастар классым эртарен, эрзя да мокша орнаментан панножо-влак дене палдарен. «Сото вий» фольклор ансамбль ««Кафта церат тикше леднить» мордва калык мурым пайремлан ямдылен ыле. А муреныт кок ансамбль, марий деке мордва ушнен.
