Нуно шкетынат, ансамбль денат шке мастарлыкыштым ончыктеныт. Еш ансамбль-влакат пайрем касым сӧрастареныт.

Эн изи гармоньчылан кум ий лийын. Тиде – Рома Марков. Ачаже, марий мурызо Александр Марков, дене пырля гармоньымат шокта, муралтен-тавалтенат колта. Изи кидше дене микрофоным шкевелкыже профессионал семын савырал мошта! Ачаже кузе коеш, туге ыштылеш. Моткоч мастар!

Концерт годым ончаш толшо-влак икмыняр еш ансамбль дене палыме лийыныт. Теве Пошкырт кундем Калтаса район Амчемучаш ял гыч ача ден эрге Андрей ден Иван Петраевмыт моткоч куандарышт. Эн чотшо Йошкар-Ола калык полмезе эргым, Ваням, совым рӱж кырен вашлийын. Иваным Йошкар-Ола калык куанен вашлиеш. Шокта-мура веле огыл, марий сем савыртышым чурий-капшын кажне ужашыже шижеш, тиде татым моткоч моторын почеш. Палемден кодыман, И. Петраев конкурсын гран-прижым сеҥен налын.

Виче кундем Кӱлмӱж районысо Мортъял ял гыч Перескоковмыт еш марий тӱвыраште изинек «пӧрдыт». Авашт, Людмила, Йошкар-Олаште тӱвыра да сымыктыш колледж деч вара шочмо велыш пӧртылын, верысе тӱвыра пӧртыштӧ тырша.

«Родион эргым гармоньым пел ий ончыч кидышкыже налын. Тидлан шӱкалтышым гармоньчо Александр Лопкин ыштен. Концерт дене толын ыле. Эргымлан шоктен мурымыжо моткоч келшен. Гармоньым налын пуаш йодо. Ачаже дене нална. Икмыняр мурым тунемын, А. Лопкинын репертураже гыч шокта да мура. Мыйын вуйлатыме «Ош пеледыш» фольклор ансамбльыште шокта. Конкурсышто кокымшо верым налын, моткоч куаненам».

Параньга район Йырмучаш ял гыч Анатолий Гордеевын ешыште эргыже-влак Игнатий да Константин семӱзгар деке кумылан улыт. Тиде ешыште нылымше тукым гармоньым шоктышо улыт. Сценыш пырля лектын, шокталтен колтымо марий калык семышт Элнет вӱдын шыратен йогымыж семын йоҥген. Конкурсышто Игнатий икымше, Констатин кокымшо верлаш лектыныт.

Поснак палемден кодыман Куженер поселко гыч Петуховмыт ешым. Ик ансамбльыш кум еш тукым погынен. Тиде ­ Татьяна Эрнестовна да пелашыже Владислав Альбертович, Кирилл да Тимофей эргышт, Юлианна ӱдырышт да ача-кочашт Эрнест Николаевич. Кирилл да Тимофей поселкысо сымыктыш школышто баян дене шокташ тунемыт. Юлианна йочасадыщ коштеш. Авашт «Шымавий» фольклор ансамбльын участникше. Владислав Альбертович шӱүырым мастарын шокта, а кочалан еш ансамбльыште тӱмырым пералташ ӱшаненыт.

Ача-ава, коча-кова да икшыве-влакын пырля шокталтымышт еш кокласе кылым пеҥгыдемдаш полша, кушкын шогышо тукымым кугурак-влакым пагалаш туныкта.