Тудын мыскара кӱчык але шке манмыжла «йолагай» почеламутшо-влакым Марий Элын сулло артистше, Марий тӱвыра рӱдерын режиссер-постановщикше Валерий Григорьев, Марий Элын  сулло артистше Борис Дмитриев, марий артист Генрих Тимиряев, тӱвыра пашаеҥ-влак Сергей Карпов ден Ирина Алексеева лудыныт.

Саламлыме мут, муро-влак касым сылнештареныт. Г. Григорьевын вуйлатыме «У муро» вокал студий, марий хор калык да эстраде мурым йоҥгалтареныт.

Марий Элын тӱвыра, печать да калык-влакын пашашт шотышто министрын алмаштышыже Игорь Садовин Геннадий Владимировичлан СВО-што улшо салтак-влак ончылно концерт программе дене миен толмылан, гуманитар полышым наҥгайымаште порысым шуктымыжлан министерствын таумутшым кучыктен.

Геннадий Владимировичын усталык памашыжым аклен ойленыт Марий тӱвыра рӱдерым вуйлатыше Василий Петров, «Марий книга савыктыш» агентствым вуйлатыше Эдуард Иманаев, «Ончыко» журналын редакторжо Игорь Попов, калык поэт Геннадий Сабанцев да молат. «Югорно» мер ушем вуйлатыше Константин Шемякин йолташыжлан мурым пӧлеклен. Мероприятийыште «Мари ушем» мер ушемын эртарыме марий йылме курсын тунемшыже-влак лийыныт.

А Геннадий Григорьев визымше книгаже могай лийшашым кызытак пала — марий басне лийшаш. Тидлан уже негызым пыштен – кок басньыже дене ончышо калыкым палдарыш.