Мероприятийым филармонийым вуйлатыше Андрей Пуртов саламлымаш мут дене тӱҥалын.
И.С. Палантай лӱмеш тӱвыра да сымыктыш колледжын «Тулгайык» калык муро коллективше «Эй, шемер марий, йывырте» мурым йоҥгалтарен.
Марий Эл Правительстве Председательын алмаштышыже — республикысе тӱвыра, печать да калык-влакын пашашт шотышто министр Константин Иванов П.С. Тойдемарын Кугу Ачамланде сар жапыште надырже нерген каласкален да «Гусли Победы» (Сеҥымаш кӱсле) проект тӱҥалме нерген увертарен.
Тыгодым Константин Анатольевич кызыт тӱвыра аланыште тыршыше-влакын посна сарзе операцийыште улшо землякна-влаклан полшымышт нерген кугешнен каласен, поснак Марий тӱвыра рӱдерын гуманитар полышым погымо да пуламыр верлаш наҥгайыме, тушто концерт-влакым эртарыме нерген тауштен ойлен.
Палемдыман, регион-влак кокласе проектым тӱвыра министерстве Марий Элын Санкт-Петербург оласе ӱшанъеҥже дене илышыш шыҥдарат.
