Йоча-влакым саламлаш марий патыр, 16 курымышто Юлъял воктенысе кундемыште илыше, Пашкан толын. Тудын рольжым моткоч устан марий тӱвыраште йомартле йӱкшӧ, гармоньым шоктымо, марий калыкнан ожнысо илышым шке Юлъял кундемыштыже шымлыме дене палыме, «Марий патыр» икымше республикысе конкурсышто гран-прим сеҥен налше Анатолий Мартынов модын, саламлыме-тыланыме шомак деч вара икмыняр таҥӱчашым икшыве-влаклан эртарен.
Пайремым унаже-влакым Звенигово районысо администрацийын тӱвыра пӧлкажым вуйлатыше Алевтина Коптелова, Марий тӱвыра рӱдерым вуйлатыше Василий Петров саламленыт, кеҥеж канышым веселан да пайдалын эртараш тыланеныт.
Мероприятийыш Звенигово, Волжский, Морко, У Торъял, Курыкмарий районла, Йошкар-Ола да Звенигово олала гыч йоча-влак погыненыт.
Нуно образовательный, йоча сымыктыш школлаште тунемыт, шинчымашым нӧлтат, ола ден ялласе тӱвыра пӧрт ден рӱдер-влак пеленысе куштышо, мурышо да семӱзгар ансамбльыш коштыт, марий тӱвыра, йӱла деке шӱмаҥыт.
Юл эҥер сереш верланыше мотор сценыште йоча-влак пошкырт марий, олыкмарий да курыкмарий, татар сем почеш кушталтен ончыктеныт, ныжыл муро почеш ончаш толшо калыкым кушталташ таратеныт.
Моткоч палыме улеш Иванов Кирилл, Красногорский поселкысо йоча сымыктыш школын тунемшыже. Тудо кок ий почела «Изи гармоньчо» республикысе фестиваль ден конкурсышто вийым терген, В.И. Ленин лӱмеш тӱвыра полатын сценыштыже ончышо-влак моткоч шокшын вашлийыныт. «Йоча тӱня» пайремыш толшо-влакымат гармоньым шоктен муралтымыже дене кушталташ таратен. Кирилл дене пырля тунемше Тимофей Никитинынат марий мурсемже кажнын кумылым налын.
Звенигово район гыч тыгак Эсмекплак кыдалаш школын тунемшыже-влак «Тек эре лийже кече» муро да пошкырт куштымаш дене куандареныт. Ташнур ялысе тӱвыра пӧрт пеленысе йоча ансамбль «Шарпан дене куштымаш» номерым ончыктен. Курыкмарий районысо Виловат рӱдӧ тӱвыра пӧртын «Вдохновение» йоча ансамбльже курыкмарий куштымашым чолган чӱчкалтен. Тысе «Чайничала» ансамбль «Пазар» муро дене палдарен.
У Торъял районысо «Шӱшпык» йоча семӱзгар ансамбль тӱрлӧ семӱзгар дене марий семым йоҥгалтарен.
Морко районысо Изи Кушна ялысе тӱвыра пӧрт гыч Виолетта Плюшкина ден Екатерина Ефремова «Ача-авалан пӧлек» мурым муралтеныт, йоча семӱзгар ансамбль «Кушна вел сем аршаш» дене палдарен, тыгак одо сем почеш мурен-куштен.
Волжский районысо Кугу Порат школ пеленысе куштышо ансамбльын изирак тӱшкаже «Эр лупс» сюжетан куштымашым ончыктен.
Звенигово оласе йоча-влак («АРТ-ГРАНД» образцовый йоча коллектив) Провой вел сем почеш веле огыл куштат, тыгак моло калыкын куштымашым ончыктат. Йоча пайремыш нуно уна-влаклан марла да татарла кушталтен пуэныт. Звенигово ола гыч Марк Митрофанов «Сирень» мурыжо дене куандарен.
Йошкар-Ола гыч мурсем костенечым «Юкече» вокал студийын участникше-влак Данила ден Богдана Коротковмыт марий эстраде муро дене палдареныт.
Посна модыш аланыште марий калык модыш дене модыныт, «Речные старты» спорт да тазалык программе ятыр йочам ушен. Мастар класс-влак лийыныт, верысе тоштерын, калык мастар пӧртын ончерышт поян лийын.
Мероприятийым Марий Элын тӱвыра, печать да калык-влакын пашашт шотышто министерствын полшымыжо дене Марий тӱвыра рӱдер, Звенигово районысо администраций эртареныт.
