Шочмо калыкнан тӱняумылымашыже, тӱвыраже, йӱлаже, эртыме корныж нерген шинчымаш уш гыч ушышко куснен аралалт толын.Ача эргыжлан, коча-кова уныкажлан ойлымо дене Сандалык, Мланде, Пӱртӱс, акретсе илыш нерген умылымаш курым гыч курымыш шергинде семын кучыкталтын. Тыгодым ала-кудо илыш сӱретше ошма пырчыла йомын, ала-кудыжо утыр вияҥын да тачысе кече марте калыкнан уш-акылжым, кӧргӧ чон шӱлышыжым волгалтара. Тиде книгаште шке палымыжым Марий юмыйӱла ушемым вуйлатыше, Тӱҥ онаеҥ Александр Таныгин каласкала. 

Автор историй фактын чын але шоя улмыж нерген огеш ӱчаше. Мунло айдемын каласкалымаштыже ала-можым туштен, шылтен ойлымо, ала-можым каласен шуктымо огыл гын, нелеш ида нал манын, лудшым йодеш. «Кажне айдемын шке ончалтышыже, шке умылымашыже лийшаш,» — манеш Александр Иванович да калыкын ойжо дене шӱдырымӧ шинчымаш шӱртым ший мундырашке пӱтыра.