Конганурышко Марий Турек, Куженер районла гыч туныктышо-влак погыненыт. Школын тунемшыже-влак тӱвыра рӱдерын пашаеҥже-влакым порын вашлийыныт.
Погынышо-влаклан Республикысе марий тӱвыра рӱдерын ыштыме паша да творческий лабораторийын тӱҥ сомылжо нерген тӱвыра да каныш пӧлкан вуйлатышыже Людмила Ивановна Кошкина палдарен.
Рӱдерын методистше Лариса Сидоркина Шорыкйол пайремлан келшыше мурым туныктыш да мондаш тӱҥалше «Йос коштыктен», «Ний кучен» модыш-влак дене модыктыш. Туныктышо-влак тиде модыш-влак дене тунемшыштым палдарена манын палемдышт да уло кумылын «Шорыкйол» нерген видеофильмым ончыктышт.
Галина Ласточкина толшаш Республикысе У ий пайрем нерген ойлен. Ынде кум ий Марий тӱвыра рӱдер республик кӱкшытыштӧ У ий кож пайремым ӱдыр-рвезе-влаклан эртара. Положений почеш, тушко тӱрло район, республик, регион да Россий кӱкшытан конкурслаште шке вийым тергыше, мер илышыште шке чулымлыкыштым ончыктышо икшыве-влакым чумыра. Икшыве-влак могай мурым палышаш улыт, могай модыш дене модаш тӱҥалме нерген умылтарен. Кож пайремыште икшыве-влак икмыняр конкурсышто шке вийыштым тергат. Мотор вургемым, кожым сӧрастараш модышым ямдылат да Йӱштӧ кугызалан серышым возат. Эн сайжылан пӧлек кучыкталтеш.
Тиде погынымаштак туныктышо-влаклан тӱрлӧ пайремым эртараш марий сценарий-влак, муро диск да книга-влакым налаш йӧн лийын.
Тунемме семын рӱдерын пашаеҥже-влак дене пырля туныктышо-влак «Льыҥ-льыҥ» модышым мурен тунемыч.
Кастене Коҥганур школын йоҥгыдо залыштыже «Марий йӱла» этностудийын концертше эртыш. Марий мурым да куштымашым, мурызо Лариса Сидоркинан мурсемжым калык лым лийде колышто.
