Тыге Марий тӱвыра рӱдер 6 январьыште Параньга районысо Усола ялыште калык дене пырля Шорыкйол пайремым тӱҥале. Вара Васли кугыза да  куваже, Агытан ушнышт да пайрем кумылым эшеат кӱшкӧ нӧлтальыч. Чыланат гармонь сем почеш умбакыже кап-кылыштым куштылемдышт. Кугезына-влакын «Ний кучен», Келшен иледа?», «Йос коштыктен», «Сокыртага» модышыштым шарналтен, уло кумыл дене модыч. Мучашлан мужедме йӱламат шарналтышт. Агытан марлан каяш шонышо-влакым поген, Васли кугызан юзо тояж гоч портышкемым кышкыктен. Эн чулымжын портышкемже у ий кожышкак пижын шинчын. Васли кугыза, воштылалын, «Тений марлан кайыде от код» манын куандарен, чыла участник-влаклан пӱкшым кучыктыш. Погынышо-влак ончыкылык илыш нерген Васли кугыза деч радамын йодыштыч,  тудат кӱлеш семын ойлен пуыш. «Тек марий калыкна улан лиеш!» — мане. 

       Тыге Марий тӱвыра рӱдер Шорыкйол пайремым веселан Марий Турек районысо Марий Купта ялыштат эртарыш, а 11 январьыште Ленин тӱвыра полатыште калыкын кумылжым нӧлтале.