Форумыш толшо-влакым РФ Кугыжаныш Думын депутатше Лариса Яковлева, Марий Эл правительствым вуйлатышын алмаштышыже, республикысе тӱвыра, печать да калык-влак паша шотышто министр Михаил Васютин саламленыт.
Паша кышкар почеш, кум тӱҥ йодышым каҥашеныт. Россий Федерацийын калыкле политикын негызше да тудым шыҥдарыше йӧн-влак нерген докладым тӱвыра, печать да калык-влак паша шотышто министрын алмаштышыже, «Саскавий» марий ӱдырамаш ушем вуйверын еҥже Галина Ширяева ыштен.
«Калыкле-тӱвыра автономий» шотышто 1996 ий 17 июньышто лекше закон нерген Мер Каҥаш вуйверын еҥже Анатолий Радыгин каласкален.
Тӱвыра идалыкыште мер ушем-влакын пашашт нерген тӱрлӧ кундем гыч толшо чолга еҥ-влак ойленыт.
Вес кечынже Мер Каҥашын визымше пленумжо эртен. Тунам кок йодышым нӧлталыныт: Мер Каҥашын еҥже-влакын IX Марий калык Погын деч вара паша лектышышт нерген; Регион-влак кокласе Марий мер толкынын негыз кагазше-влак нерген. Тӱҥ шотышто: верлаште калыкле-тӱвыра автономийым ыштыме нерген ойленыт. Тыгай автономий-влак таче Одо, Киров да Угарман кундемлаште, Татарстаныште, Санкт-Петербугышто улыт. Свердловск велне ышташ документым погат. Пошкырт кундемыште тидым ышташ шонат.
