Рӱдерын тӱҥ пашаж нерген вуйлатыше Валерий Григорьев каласкален. Методист-влак тӱрлӧ оҥай проект дене палдареныт: йоча да молодёжь дене  пашам ыштымаште, фольклорым шымлымаште да вияҥдымаште.     

 Марий-влакын тӱшкан илыме регионла дене пашам ыштыме нерген Рӱдерым вуйлатышын алмаштышыже Римма Юрьева ойлен. Тӱшка тӱвыра паша шотышто пӧлкам вуйлатыше Людмила Кошкина Марий университет дене пырля пашам ыштымым почын пуэн. Увер вияҥдымаш да вашкыл шотышто пӧлкам вуйлатыше Эльвира Куклина Марий тӱвыра рӱдерын пашаштыже Интернетым кучылтмо нерген рашемден.

Вашлиймашым иктешлымаш семын бард да Рӱдер пеленсе «У муро» вокал студийым вуйлатыше Геннадий Григорьев шке возымо мурыжым йоҥгалтарен да муро аланыште «шӱдыр» лияш шонышо-влакым шке студийышкыже ӱжын.