Кажне гана ЭТНОPARTY тӱрлӧ темым нӧлталеш. Теве 23 октябрьыште тудо ссуз ден вузлаште икымше курсышто тунемше-влаклан пӧлеклалтеш. Сандене тиде кечын икымше курсын студентше-шамыч касышке 50 теҥгем гына тӱлен пурен кертыт! Лач студент билетым ончыктыман.
Мутат уке, «ЭТНОPARTY» проектын ик эн кугу шонымашыже — ял гыч толшо ӱдыр-рвезе-влаклан олаште илаш, шке верым муаш полшаш, нунылан мыняр-гынат ты шотышто эҥертыш лияш.
Тыгак ЭТНОPARTY — тиде тукым-влакым ушышо вер. Ты гана касыште ӱжына чылаштым, кӧ ала-кунам студент лийын. Айста, шарналтена поро пагытым ала пырля тунемше-влакымат ӱжына!? Тыге ик группышто, ик жапыште тунемше йолташ-влак дене лач ЭТНОPARTY-ште вашлийын кертына.
Кас кышкарыште тӱрлӧ акций эртаралтеш. Кок йолташым кондеда гын — шкеже яра пуреда. Изарнян шочмо кечым палемдыше-влакат кум йолташышт дене пырля, паспортым ончыктен, яра пурен кертыт!!!
Да, таче Йошкар-Олаште шуко вере марий дискотеке эрта. Мо дене у дискотеке ойыртемалтеш? Мутат уке, лӱмжӧ дене. Но эн тӱҥжӧ, ЭТНОPARY-ште марий да моло финн-угор йылме дене муро-влак йоҥгат. Артист-влакат тӱрлӧ йылме дене мурышо толыт. Тыгак касыште «илыше» семӱзгар дене эреак шоктат.
Вашлийме вер: «Чили» диско-барыште (Сомбатхей, «Саварий» ост., кызыт «Йошкар-Олалан 400 ий лӱмеш парк» маналтеш). Тушто машинам шогалташ кумда вер уло, барыште моткоч тамлын пукшат. Кас 21 шагатлан тӱҥалеш да 2 шагат йӱд марте шуйна.
