Икымше кечын Мер Каҥашын пленумжо лийын. Ик эн тӱҥ йодыш самырыктукым дене кылдалтын. Ты шотышто тӱҥ докладым Марий Оньыжан алмаштыже Алёна Иванова ыштен. Тудо тӱрлӧ кундемыште илыше ӱдыр-рвезе-влакым ушышо проект-влакын кӱлешлыкышт нерген ойлен. Мутлан, марий самырыктукымын Россий кӱкшытан слётшо, «Мый марла ойлем» да «Кнага — яллан» акций-влак, сылнымут да куштымаш флеш-моб.

Тиде кечынак Василий Блиновын, Геннадий Григорьевын, Игорь Ивановын, Любовь Михееван, Юрий Морозовын, Раиса Попован да Юрий Юсуповын верысе Мер Каҥаш активын паша лектышыж нерген да Марий Эл ден марий-влак тӱшкан илыме регионла коклаште вашкелшык-влак шотышто уверым колыштыныт.

Вес кечын конференций эртен. «Марий Элыште калык-влак кокласе конфессий кыл: социал паша шынык» темым нӧлталыныт. Тидын нерген Марий Элысе тӱвыра, печать да калык-влакын пашашт шотышто министр Михаил Васютин ойлен. Тыгак улшо ото-влакым аралыме да у кумалме верым почмо паша шотышто йодышым каҥашеныт. Шке ойыштым Марий кундемын тӱҥ онаеҥже Александр Таныгин да моло вер гыч толшо онаеҥ-влак ойленыт.

Марий форум кышкарыштак Марий-влакын Федерал калыкле-тӱвыра автономийым пеҥгыдемдыме конференций лийын. Тиде автономийым вуйлаташ РФ Кугыжаныш Думын депутатше Лариса Яковлевалан ӱшанен пуэныт.

Тунамак «Марийцы Пермского края» книга презентаций эртен.

Марий форумыш толшо-влак «Марий памаш» фольклор ансамбльын юбилей концертышкыже, М.Шкетан лӱмеш Марий кугыжаныш драме театрын 95 ияш юбилейышкыже миен коштыныт.