Квест-модышым чÿчкыдын огыт эртаре, садлан шукынжо мо тиде тугай манын йодыт? Тудо 10 этап гыч шога. Ме нуным «Станций» манын лÿмденна. Кажныштыже команде-влакым оҥай заданий вучен: писатель-поэт-влакын лÿмышт ден псевдонимыштым палаш, ребусым решитлаш, почеламутын авторжым пален налаш, кроссвордысо йодыш-влаклан вашмут-шамычым пуаш да тулеч молат. Кажне йодышым марий сылнымут дене кылдыме.

Командылаште вич участник гыч лийыныт. Модышыштына Йошкар-Оласе 1-ше, 2-шо, 7-ше, 17-ше, 20-шо №-ан, Семёновкысо школ-влакын, 4-ше да 14 №-ан гимназий-влакын тунемшышт шке уш-акыл келгытым тергеныт. 

Ик станцийлан 3 минут наре жап ойыралтын, но йоча-влак тудым писын эртеныт. Кроссворд гына шуко жапым налын. Ик станцийыште писательым але поэтым фото гоч пален налаш кÿлын. Нуно кумытынат палыме улыт, но иктыже таче кечысе поэт лийын. Вашмут ончыктен: йоча-влак утларакше ондакысе классик-влакым палат. Пытартыш станцийыште сÿрет почеш памятникым палаш кÿлын. Тыштат икмыняр оҥай вашмут-влак лийыныт. 
Туге гынат, икшыве-влак марий йылме да литератур деке шÿман улмыштым ончыктеныт. Тидым жюри председатель филологий шанче кандидат МарГУ-со марий йылме да литератур кафедрын доцентше Зоя Константиновна Иванова палемден коден. 

Квест-модышышто Йошкар-Оласе 7-ше №-ан школын командыже сеҥен. Тудым пöлек ден диплом вучен, моло участник-влаклан сертификатым кучыктымо.