Исполкомын заседанийже деч вара конференций тӱҥалын. Паша жап радам дене каен. Ондак “Марий калык конгрессын” председательже Э.Александров идалык жапыште ыштыме пашаж дене палдарен, а тудыжо изи огыл. 2015 ийыште шуко кугу марий мероприятий эртаралтын. Кажныштыже конгрессын еҥже-влак пашам ыштеныт.

Йӱла почеш, идалыкым иктешлыме годым кок районысо пӧлка вуйлатышын докладшым колыштыт. Тений ты пашам Курыкмарий да Звенигово районысо пӧлкам вуйлатыше-влак М.Егоровалан да Н.Зориналан ӱшаненыт. Мер пашаеҥ-влак жапым арам эртарен огытыл. М.Егорова “Кравец-2015” самырык тукым форум нерген шуко каласкален. Районышто “Акпарс” радиостудий пашам ышта. Тудо этнодискотеке-влакым эртара. Звенигово район гыч Н.Зоринан докладше пӧлкан активистше-влак нерген утларакше лийын. Чылаже 34 чолга еҥ тырша. Нуно пырля мер пашам ыштат. Ӱмаште ты районыштак Марий самырык тукым слёт эртен. Тудын нергенат мут лектын.

Марий Эл Республикысе тӱвыра, печать да национальность паша шотышто министр М.Васютин М.Егорова ден Н.Зоринам министерствын почётан грамотшо дене палемден.

Ӱмаште пашам иктешлыме, эн тале-влакым премий дене палемдаш кутырен келшеныт. Йошкар-Оласе пӧлкам вуйлатыше В.Наумов тидлан шийвундым ойырен. Тыге “Чолга марий” премий шочын. Тудым З.Александровалан, Н.Зориналан да В.Кудрявцевлан кучыктеныт. 

Икымше оналмаш В.Мочаев погынлан ямдылалтме нерген каласкален. Лишыл жапыште районлаште делегат-влакым сайлат. Районысо погынымашлашке район пропискан гына йӱклаш толын кертыт. Кажне вич делегатлан ик эскерыше лийшаш.

Пытартышлан “Марий калык конгрессын” вес ийлан еҥже-влакым палемдыме. Йӱклымӧ почеш, председательлан адакат Э.Александров кодын. Тудын алмаштышыже – Н.Пушкина.