Фестивальым 10 шагатлан тÿҥалме. Студент, тунемше, туныктышо, уна-влак ончылно, а нуно ты кечын ятыр погыненыт, Республикысе марий тÿвыра рÿдер пеленсе «Юкече» йоча ансамбль да Олык Ипай лÿмеш Кугыжаныш премийын лауреатше Светлана Яндукова выступатленыт. Шочмо йылмым аралымашын кÿлешлыкше нерген Марий Эл Республикын тÿвыра, печать да калыкле паша шотышто министрын алмаштышыже Г.С.Ширяева да МарГУ-н ректоржо М.Н.Швецов каласеныт.
Паша радам почеш 19 йылме дене палдарыме. Кажне презентаторлан 45 минут пуалтын. Ты жапыште нуно тÿвырашт нерген каласкаленыт, шочмо йылмышт дене эн кÿлышан мут-влакым чын ойлаш туныктеныт.
Презентатор-влак: марий йылме – Вероника Мустаева да Анна Васильева; руш йылме – Елена Белецкая, Андрей Норкин, Светлана Поздеева да Бусыгина Мария; англичан йылме – Джулия Шорохова; француз – Анастасия Эшполдина; немыч – Людмила Мамаева; чечен – Малика Дакаева; армян – Ася Чобанян; узбек – Мухайёхон Абдуллаева; татар – Алина Шаяхкамова; лакс – Магомедамин Цимпаев; финн – Валентина Гаврилова да Елена Соловьёва; венгр – Анна Смирнова; удмурт – Веста Андреева да Наталья Кириллова; туркмен – Айнура Абдырайимова; киргиз – Жоомарт Муктарбеков; таджик – Хушнуджон Кушатов; азербайджан – Умид Муразов да Егане Гачаева; чуваш – Наталья Расторгуева да Анна Архипова; украин – Инна Иванова да Ольга Попова.
Самырык еҥ-влак йылме дене гына огыл, эл денат палдареныт. Шукынжо туштак шочын-кушкыныт, а мемнан кундемыш лач тунемаш гына толыныт. Тидыже презентацийым эше оҥайракым ышташ полшен.
Кечывал марте пашам ыштымеке, кофе-брейк годым каналтыме, а вара умбакыже пашам шуйымо.
Фестиваль сылне концерт дене мучашлалтын. Тушто тÿрлö калык гыч лекше-влак шке куштымашышт да мурышт дене куандареныт. Кажне презентаторым диплом дене палемдыме.
Пайрем концерт годым вÿдышö-влак каласен коденыт: «Иктаж йылме дене мутланыше эн самырык еҥлан 60 ий але утларак гын, ты йылме огеш аралалт». Но эртыше фестивальын пашаж гоч коеш – шочмо йылме дене кутырышо да тудын верч тыршыше самырык еҥ-влак шукын улыт. Республикысе марий тÿвыра рÿдер презентатор да пайремын унаже-шамычлан таум ойла.
