Экстремизм йодыш эреак пÿсын шоген. Тудо икмыняр тÿрлӧ лийын кертеш, но эн шарлыше-влак – националистический да религийысе. Шукыж годым тыгай шÿлышым интернет гоч шараш тыршат. Экстремизм ваштареш кучедалше рÿдерын сотрудникше-влак тушто лекше материал-влакым эскерат да кертме семын шылтат.

«Туркмен-влак коклаште тыгай шÿлыш уке», — каласкаленыт туркмен студент-влак. Экстремизм йодышым каҥашыме деч вара лач ты калыкын чолга ÿдыр-эргышт мемнан деке вашлиймашке толыныт. Туркменистан ондак СССР-ын кӧргысӧ республике лийын. Садлан туркмен-влак кызытат шочмо йылмышт деч посна рушымат сайын палат. Ты эл гыч студент-шамыч ПГТУ-штат, МарГУ-штат тунемыт. Уна-влак шке калыкышт, элышт, йÿлашт да тулеч моло нергенат каласкаленыт. Туркменистаныште граждан-влакын социальный гарантий, самырык тукымым патриотизм шÿлыш дене куштымаш шотышто кугу паша ышталтеш.