Чылаже 18 йодмаш пурен. 12 видеойодмаш лийын, а кудытшым жюри ончаш миен. Кажне районышто йӱлалан эҥертыме койын. Верысе калык площадкым ыштен, лӱҥгалтыш-влакым сакен. Нуно тӱрлӧ лийыныт. Чаманен каласаш логалеш, шоген лӱҥгалташ йӧршӧ-влакым чыла вере ыштен огытыл. 
Верлаште тӱвыра пӧрт пеленсе ансамбль-влак пайрем эртарымым модын ончыктеныт, лӱҥгалтыште лӱҥгалтеныт. Чыла паша-влакым жюри 29 апрель гыч 6 май марте ончен. Республикысе марий тӱвыра рӱдерым вуйлатыше Н.Пушкина жюри председатель лийын:
— Пайремым эртарыме верым да лӱҥгалтышым ямдылымым, верысе калыкын ушнымыжым да йӱлалан эҥертымым акленна. Районлаште шке вел йӱлаштым ончыктен моштеныт.

 Конкурсым иктешлымеке, сеҥыше-влакым палемдыме: I вер — Кужеҥер районысо Чодраял тӱвыра пӧрт, II вер – Марий Турек районысо Сардаял да Звенигово районысо Тошнур тӱвыра пӧрт-влак, III вер – У Торъял районысо Кугу Овалже да Марий Турек районысо Арбор тӱвыра пӧрт-влак. Морко районысо Шлань тӱвыра пӧртым Гран-при дене палемдыме. Кажне участникым диплом да пӧлек вученыт. 
7 майыштат, Кугече республикысе пайремым эртарыме годым конкурсна шуйна ыле гын, Волжский районысо Руш Шайра тӱвыра пӧртат сеҥыше-влак радамыш логал кертеш ыле докан. “Шайра” ансамбльын участникше-влак йӱла почеш пайремым эртарымым сылнын модын ончыктеныт. Тыгак уна-влакым «Арбор кундем» да «Олыкмарий» (Марий Турек район), «Ош пеледыш» (Кужеҥер район), «Эркече» (Морко район), «Эрвий» (У Торъял район), «Шайра» (Волжский район), «Чон оҥгыр» (Йошкар-Ола) шке мурымашыштт да куштымашышт дене куандареныт. 
Кугече пайрем “2013-2020 ийлаште Марий Эл Республикын кугажыныш нацональный политикыже” кугыжаныш программе почеш эртаралтеш. Тудым Марий Эл Республикын тӱвыра, печать да калык-влакын паша шотышто министерствын полшымыж дене Республикысе марий тӱвыра рӱдер эртарен. 
Ӱшанен кодына — “Кугече лӱҥгалтыш” конкурс калыклан пайремым йӱла почеш пайремлаш полшен да тудым сӧрастарен. Организатор-влакын мутышт почеш, тудым ончыкшымат эртараш шонат.