Тушто Чуваш Республик вуйлатыше Михаил Игнатьев, Российысе калык-влак Ассамблей Ушемым вуйлатыше Светлана Смирнова, Чуваш Республик вуйлатыше пелен старейшин-влак Ушем вуйлатыше Лев Кураков, Чуваш Республикын тӱвыра, калык-влакын пашашт да архив паша шотышто министрын сомылжым шуктышо Константин Яковлев, Шупашкар олан да Чувашийын Митрополитше Варнава, Москва олан, Рӱдӧ регион ден Чувашийын Муфтийже, Россий Федерацийын мер палатыжын еҥже Албир Курганов, Россий Федерацийын мер палатыжын еҥже Николай Дроздов да молат.

Погын тӱҥалме деч ончыч «Чуваший Российысе, Белоруссийысе да Украинысе сӱретче-влакын шинчашт дене» Кокелев лӱмеш тӱнямбал плэнерын участникше-влакын ончерышт дене да Чуваш кугыжаныш сӱретче тоштерын да Шоршелы села гыч кондымо тӱрлӧ калык гыч лекше мастар-влакын сӱретышт дене палыме лийме. Тыгак Чувашийын социал да экономик велым вияҥме нерген каласкалыше ончерым почмо. Республикыште илыше тӱрлӧ калыкын тӱвыражым да йӱлажым почын пуышо ончерат пайдале лийын. Тыште Погынын делегатше ден унаже-влак марий тӱвыра да марий кочкыш дене палыме лийыныт гына огыл, кочкышымат тамлен кертыныт.

Погынышто Чуваш Республикыште илыше калык-влакын Ассамблейыштым ыштыме. Тушко Чувашийысе марий-влакын тӱвыра автономийжым вуйлатыше Наталья Романовам пуртымо. Чуваш Республик вуйлатыше М.Игнатьев, калык-влак коклаште келшен ыштыме пашам кӱкшын аклен да Наталья Анатольевна Романовалан Таумутым кучыктен.