Мероприятийым университетын национальный культур да культур-влак коклаште коммуникаций институтшым вуйлатыше Р.И.Чузаев почын да пайрем кече дене студент да ӱжмӧ уна-влакым саламлен. Тудым эртарымаште университетын В.А.Панова лӱмеш шанче лудмыверын пашаеҥже-влак кугу надырым пыштеныт. Калык да краеведений пӧлкам вуйлатыше Г.Т.Корнилова ден библиограф С.Г.Багаеван тыршымыштлан кӧра калык-влакын курчак да «Йылме — айдемын  шӱм-кыл ден вийже» книга ончерышт почылтын. Тыгак нуно студент-влак коклаште «Родо-тукыметым палет мо?» викториным эртареныт. Йодышлан чын вашмутым пуымышт дене икымше курсын студентше-влак Надежда Лаврентьева ден Наталья Митрофанова, кумшо курсышто тунемше Злата Зубкова ойыртемалтыныт. Нунылан  МарГУ да Республикысе марий рӱдер деч Чап танык ден шергакан пӧлекым кучыктымо.

Марий йылме да сылнымут кафедрын туныктышыжо Е.Г.Ласточкина «Финн-угор калык-влак: эртыше да кызытсе илышыже» лудмо докладше презентаций сынан лийын. «Марий йылме» йылме технологийым шымлыме да туныктымо рӱдерын пашаеҥже, педагогик шанче кандидат В.Т.Михайлов марий калык да, марий шанчызе-влакын  шымлымашыштлан эҥертен, «черемис» шомакын кузе лекмыже да мом ончыктымыжо нерген каласкален.

Финн-угор калык-влакын кечышт вашеш Республикысе марий тӱвыра рӱдер родо-тукым калык-влакын илышышт нерген йомак конкурсым увертарен ыле. Эртыше мероприятийыште тудым иктешлыме. Рӱдерын тӱвыра да калык дене пашам ыштыме шотышто пӧлкам вуйлатыше Л.И.Кошкина национальный культур да культур-влак коклаште коммуникаций институтын 2-шо курсын студенткыже Христина Александровалан Тауштымашым да шергакан пӧлекым кучыктен.