Марий калыкна унам кинде дене вашлийын, тудыжым моторын тӱрлымӧ солык дене кучен. Икшывылан посна солыкым тӱрлымӧ, качым йӧратыме кумылым солыкым пӧлеклыме дене ӱдыр почын. Сӱанлан ямдылалтме да тудым эртарыме йӱлам шуктымо годымат солыкым кучыктеныт. Тыгак ончаш толшо-влак шӱдӧ ий ончыч ямдылыме кок солыкым Советский район гыч конденыт. Икымшыже киндым кондымо, весыже сӱан йӱла гыч солыкым пуымо дене кылдалтше лийыныт.

Звенигово оласе краевед тоштерын пашаеҥже-влак «Армийыш ужатыме солык» композиций дене икымше верыш лектыныт. Курыкмарий район гыч Тамара Петрован ешыжын «Вуйпидме солык» нерген пашажым кокымшо вер дене аклыме. Йошкар-Ола гыч Ираида Степанова ден Кристина Лебедеван ямдылыме «Пӱрышӧ Юмылан солык-пӧлекышт» кумшо степенян диплом дене палемдалтын. Советский район гыч Галина Волкова посна приз дене палемдалтын. Тудо шӱдӧ ияш марлан толмо солык нерген оҥайын каласкален.

Конкурс муро ден куштымашлан поян лийын. Любовь Купсольцеван, Светлана Яндукован, Олег Бакутовын, Валентина Петрован, «Мурсем» мурышо да куштышо ансамбльын да «Цармис» куштышо театрын выступленийыштым ончышо-влак шокшын вашлийыныт.

«Саскавий» марий ӱдырамаш ушем вуйлатыше Л.И.Кошкина ден ушемын еҥже-влак «Марий солык пайрем»  таҥасымаш сынан касым эртараш полшышо амалкалче-влак: «Амарис» ден «М-тур» фирме-влакым кучышо Ольга ден Валерий Аптышевмытлан, Надежда Михайловалан да «Она» фирмым вуйлатыше Нина Орманлан – кугу таум каласа. Республикысе марий тӱвыра ушемат, марий калык йӱлам арален да вияҥден колтымо пашам аклен, конкурсым эртарен колтымашке шке надыржым пыштен.