Российысе калыкын да йот йылме-влакым тунемаш кумылаҥдыме, Марий Эл ден Российысе самырык тукым коклаште тӱрлӧ велым кылым пеҥгыдемдыме, йылме-влакын кӱлешлыкшым да чапшым нӧлтымӧ амал дене тӱвыра да туныктыш сынан тиде мероприятий эртаралтеш. Тушко студент, аспирант, туныктышо-влак ӱжалтыт, тыгак вес калыкын тӱвыражым аклыше да йылмыжым палаш кумылым почшо чыла еҥ толын кертыт.
31 январьыште Марий кугыжаныш университетыште Республикысе марий тӱвыра рӱдер директор Н.В.Пушкинан вуйлатыме почеш оргкомитетын икымше заседанийже эртен. Тушто йылме фестивальым эртарыме нерген Положенийым ончен лекме да пеҥгыдемдыме. Фестивальыште эртыше ийысе семынак вес калыкын кутырымо йылмыже да тӱвыраже дене палдараш тӱҥалыт.
«LINGVA-территорий» йылме фестиваль Марий кугыжаныш университетын Калыкле тӱвыра да тӱвыра кокласе коммуникаций институтышто эртаралтеш. Адресше тыгай: Кремлевский урем, 44 пӧрт. Мероприятий 13 шагатлан тӱҥалеш.
